Nehemiya 6 - Livulu lya Shukulu Kalunga

Nehemiya vamwaka a munga yakumulwisa

¹ Sanevalate, na Toviya, na Ngesheme, na vungi vwa vitozi vetu vazivile ngeci tunamanesa kutunga civumbe, co kukwesi mbengwa lalo yasaleleo, oloni nameme ngoco kwacisalele kwaaka mapito ku vikolo.

² Ngecivene, Sanevalate, na Ngesheme vatumine muluwa, co valombele ngeci njikaliwane navo mu limbo limo lyakala mu Cana ca Ono. Eci capwile civembulu cavo cakweseka kunjivulumuna.

³ Njatumine miluwa kuli vakevo nakukavaleka ngwange, “Yange njilinakupanga vipangi vyakama, kunjasa kuyako embwe. Kunjasa kwimika vipangi nakwija oko nakumimona lika embwe.”

⁴ Vanjituminine muluwa na lijwi lyakufwa mumo visimbu viwana, co njavakumbulwile mu cifwa cimo.

⁵ Asinoni Sanevalate watumine ngamba yendi umo kuli yange simbu yamucitanu, muluwa ou wambatele mukanda wakufukula mu livoko lyendi.

⁶ Co akuulava ngwavo, “Ngesheme nanjileke ngwendi kuli lingwavo lilinakwendangana akati ka vanu twalyata navo, ngwavo yove na vanu va vaYunda muli na ciyongo cakutengulukila vaka-kushwana mukemwo yeni mulinakutungulula civumbe. Co lalo nendeka ngwendi yove uli na vutumbe vwakulipwisa mwene yavo,

⁷ lalo ngwavo yove unalivwaesela vaka-kwimanena vamo kwambulula mu Yelusalema ngeci yove unapu u mwene wa mu Yunda. Co vakambulula kuli mwene a n̄anda eyi, ngeci njayongwele ngwange ija tuliwane twakusimutwiye a n̄anda eyi.”

⁸ Njamukumbulwile ngwange, “Nacimo cai eci yove ulinakwendeka cinapu ca vushunga. Evi vyoshe vinapu vutumbe vwove lika.”

⁹ Vashakele kutuzivisa lyova tuvavoshe ngeci vipangi vimane. Co njalombelele ngwange, “Ololo, Shukulu Njambi, njipwise muka-nzili!”

¹⁰ Co a simbu eyi vene, njaile ku njuvo ya Shemaya, muna Ndelaya mutekulu wa Mehetambele, uje kasele kuseza njuvo yendi, wendekele kuli yange ngwendi, “Nove nange tunapande tuye nakuvanda amolika mu Mwela Wakujela wa Njuvo Shukulu Kalunga nakulishokelamo, omwo vakevo valinakwija mukukutsiya. Oshe aje avashakela a simbu ya vutsiki vakaija mukukutsiya.”

¹¹ Co yange njamukumbulwile ngwange, “Yange kunjesi na cifwa cakutewa munu nakuvanda. Kuma yove unayongola ngwove yange njasa kweseka kwamena mwonyo wange akuvanda mu Njuvo ya Shukulu Kalunga ndi? Kunjasa kulingamo embwe.”

¹² Omo yange njanangukile, njawanene ngeci Njambi kendekele kuli Shemaya embwe, oloni Toviya na Sanevalate vamwanene lizika-kanwa ngeci endeke civembulu kuli yange.

¹³ Vamwanene lizika-kanwa mukunjizivisa lyova ngeci njikovele mu vuvi, nakunjiviisa lizina nakunjivayesa.

¹⁴ Co njalombelele ngwange, “Shukulu Njambi, anuka evi vivanalingi va Toviya na Sanevalate, co vanyanyamese. Anuka uje munakazi Nondiya na vakwavo veka vaka-kwimanena vaje vesekele kunjizivisa lyova.”

Kuhwa kwa vipangi

¹⁵ Munima ya matangwa makumi atanu na avali akupanga ku civumbe cavukovelelo, co cahwile mu litangwa lyamumakumi avali na atanu mu ngonde ya Elule.

¹⁶ Omo miyati ya vitozi vetu vaje vatuzengelekele vazivile eci, vanangukile ngeci kuvakele na cinyangavili oni, omwo munu na munu wazivukile ngeci vipangi evi vyalingiwile a kukwasa kwa Njambi.

¹⁷ Simbu yoshe eyi vantwama va vaYunda vakele nakutuma mikanda yaingi kuli Toviya.

¹⁸ Vanu vavangi va Yunda vemanenene ku mutambela wendi omwo ishemweno Shekaniya muna Ala wapwile kaYunda. Co munendi Njehohanane wambatele muna Meshulame muna Mbelekiya.

¹⁹ Vanu vakele nakusimutwiya ku mesho ange a vilinga vyoshe vyavivwa vije vyalingile Toviya, co lalo vamulekele vyuma vyoshe vije njendekele. Co ikeye wakele nakunjitumina-tumine mikanda yakunjizivisa lyova.