Nehemiya 2 - Livulu lya Shukulu Kalunga

Nehemiya aya ku Yelusalema

¹ Ku litangwa limo, munima ya vingonde viwana, omo Mwene Aletasheleshe wakele ku mesa nakulya, co njamutwalelele vinyu. Co kanda anjimone laja njazeye,

² ngecivene, wanjihwile ngwendi, “Omwo vikajo unaviilila? Yove kuuvinji, oloni cinasholoka ngeci kuwesi nakuvwaelela.” Njazivile lyova manene,

³ co njamukumbulwile ngwange, “Shukulu yoya ku myaka yoshe! Vikajo njijenekela kuviilila omwo ku nganda kuje kuvatsinda vakukulwila vange kunapu ku ngundu, co na vikolo vyayo vavyenyeka na tuhya?”

⁴ Mwene wanjihwile ngwendi, “Cooni ushaka vikajo?” Co njalombelele kuli Njambi wa Mwilu,

⁵ asinoni njendekele kuli mwene ngwange, “Nga cinavwaelelesa shukulu, co nga ngamba yove nawana kutetela ku mesho ove, njitave ngeci njiye ku lifuti lya Yunda, ku nganda kuje kuvatsinda vakukulwila vange, ngeci njikaitungulule.”

⁶ Mwene watumbamene amolika na lishano lyendi, co watavele majwi ange. Wanjihwile simbu injikakala kuje, na simbu injikeluka, co njamulekele simbu.

⁷ Asinoni njamulombele ngeci anjizivileko mema ku mbunge nakunjanako mikanda ya kuli vanguvulu va mu Kangombe ka Yambi ka Yufuleti, nakuvaleka ngeci vanjitave njiye ku Yunda.

⁸ Co lalo njamulombele mukanda wakuya kuli Asafe, muka-kunyunga shwata ya vumwene, nakumuleka ngeci anjaneko miti yakushonga mikambo ya ku vikolo vya ku cimpaka cije canyunga Njuvo ya Shukulu Kalunga, neyi ya vivumbe vya nganda, na mikambo ya njuvo muje munjikakala. Co Mwene wanjanene vyoshe vinjamulombele, omwo Njambi wakele amo nange.

⁹ Mwene watumine vamyata va nzita, na vaka-kwenda a tuvalu kuya amo nange, co njaile vungenzi vwa mu Kangombe ka Yambi ka Yufuleti. Co kuje njaanene vanguvulu mikanda ije yatundile kuli mwene.

¹⁰ Oloni Sanevalate, wa mu limbo lya Mbete Holone, na Toviya, mwata wa lifuti lya Amoni, omo vazivile ngeci kunaija munu umo akwase vanu va Isalele, vimbunge vyavo vyavavalele manene.

¹¹ Njaile ku Yelusalema, njakeleko matangwa atatu,

¹² naumo wai njalekeleko a vije vyaakele Njambi mu mbunge yange kuvilingila ku Yelusalema. Asinoni mukati ka vutsiki njakatukile, njaile na vanalume vavandondo lika. Co twaile lika na cimulu uje injalondele.

¹³ Anga kwakele vene vutsiki omo njatundile mu nganda nakwita mukati ka Cikolo ca ku Cimbongo, mu Kangombe ka Yambi, co njaile mu mbwela, njatuvakanene Lisima lya Canza-ngombe na Cikolo ca Vyuma vya Mazilo. Omo njakele nakuya, njelwile vivumbe vya nganda vije vyasiwukile, na vikolo vije vyenyele na tuhya.

¹⁴ Asinoni ku mutambela wa mu ngangela ya nganda, njaile ku kunto ku Cikolo ca Lisima nakweta ku Lishali lya Mwene. Co cimulu uje injalondele kasele kwita muje,

¹⁵ ngecivene, njashwangesele cimbongo ca Kindelone, co njelwile civumbe. Asinoni njelukile ku ngila ije vene injezilile, co njelukile nakukovela mu nganda ku Cikolo ca ku Cimbongo.

¹⁶ Naumo mwata wai wa ku mutambela uje wazivukile kuje kunjaile, nambe vije njalingile. Evi vyalingiwile omo te kanda njicilekeko cuma cimo kuli vakwetu vaYunda, na vaka-kukombelela, na vantwama, na vamyata, nambe veka vaje vakapanga vipangi.

¹⁷ Co njendekele kuli vakevo ngwange, “Kengeni vukalu ovu tulinavwo, omwo Yelusalema inaviya na vikolo vyayo vanavinyongesa! Ijeni tutungulule vivumbe vya nganda ngeci kesi tuzive shwamwa.”

¹⁸ Co njavalekele oni muje Njambi mwakele amo nange nakunjikwasa, na muje mwendekele mwene kuli yange. Co vakumbulwile ngwavo, “Ijeni tushangumuke kutungulula!” Co vashangumukile kupanga.

¹⁹ Omo Sanevalate, na Toviya, na kaAlavya umo lizina lyendi Ngesheme vazivile a vutumbe vuje vutwashakele kulinga, co vatujolele nakutushendumuna nakwendeka ngwavo, “Vikajo mulinakuyongola kulinga? Yeni mushaka kutengulukila mwene ndi?”

²⁰ Co njavakumbulwile ngwange, “Njambi wa Mwilu ikeye akatuhyanesa. Yetu tunapu tu vangamba vendi, co tulinakushangumuka kutunga vene. Oloni yeni kumwesi na mutambela nambe moko, nambe amo akumyanukilao muno mu Yelusalema.”