Nehemiya 13 - Livulu lya Shukulu Kalunga

Kulyangunuka na vaka-kwija

¹ Omo valavelele vanu Lishiko lya Mosesa, co vetele a mutambela uje vasonekele ngeci kukwesi kaAmoni nambe kaMowavi ivakatavesa kulipandakana na vanu va Njambi.

² Eci calingiwile omwo vanu va Amoni na vanu va Mowavi kuvanene vyakulya nambe mema kuli vaIsalele omo vakele mu vungenzi vwavo vwakutunda ku Ingito. Oloni vafwetele vimbongo kuli Mbalame ngeci asinge vaIsalele, oloni Njambi yetu watengulwile cije cisingo kucipwisa civezikiso.

³ Omo vanu va Isalele vavalavelele lishiko eli, co vatundisile vaka-kwija voshe akati kavo.

Nehemiya atengulula vyuma

⁴ Elyashimbe Muka-kukombelela, uje wakele na moko yakunyunga milili ya mu Njuvo ya Shukulu Kalunga, wapwile musamba wa Toviya simbu yakama.

⁵ Co watavesele Toviya kupangesa mulili wakama uje vapandele lika kutulikilamo milambu ya vimbuto, na insense, na vivala vyakupangesa mu Njuvo ya Shukulu Kalunga, na milambu ya vaka-kukombelela, na vyavulikumi vya vimbuto, na vinyu, na mazi a olive aje vakele nakwana kuli vaLevi, na kuli vaka-kwimba mu Njuvo ya Shukulu Kalunga, na kuli vaka-kunyunga ku Njuvo ya Shukulu Kalunga.

⁶ Omo evi vyakele nakulingiwa ngacije, kunjakele mu Yelusalema, omwo mu mwaka wamumakumi atatu na ivali omo Aletasheleshe wapwile mwene wa Mbambilone, ukewo mwaka njelukile kutwala vukaleo kuli ikeye. Omo kwetile kasimbu kakandondo lika, co wanjanene lisesa

⁷ lyakwiluka ku Yelusalema. Njakomokele manene akuwana ngeci, Elyashimbe naana Toviya mulili wa ku cipango ca ku Njuvo ya Shukulu Kalunga.

⁸ Co njaluvalele manene, njombangelele anja vyuma vyoshe vya Toviya.

⁹ Njashikile lishiko ngeci vajelese milili, co njelwisililemo vivala vya mu Njuvo ya Shukulu Kalunga, na milambu ya vimbuto, na insense.

¹⁰ Njazivile lalo ngeci vaka-kwimba mu Njuvo ya Shukulu Kalunga na vaLevi vamo, vanatundu mu Yelusalema vaneluka ku mahya avo, omwo vanu kuvakele nakuvana vyakulya vyavingi vyakuvayoyesa.

¹¹ Co njaluvalele manene na vamyata njendekele ngwange, “Omwo vikajo munecelela vanu ngeci vatunde ku Njuvo ya Shukulu Kalunga?” Njelwisile vaLevi na vaka-kwimba ku Njuvo ya Shukulu Kalunga, co njavanene lalo vipangi.

¹² Asinoni vanu va Isalele voshe vashangumukile lalo kunena ku milili ya ku Njuvo ya Shukulu Kalunga vyavulikumi ku vimbuto, na vinyu, na mazi a olive.

¹³ Co njemikile vaka-kunyunga ku milili yakutulikila vapwile, Shelemiya, muka-kukombelela, na Zandoke, muka-kusoneka, na Pendaya kaLevi. Hanane, muna Zakule, mutekulu wa Mataniya, wapwile muka-kuvaata. Ava voshe njavaangwile omwo vavatumbwile ngeci vapwa va kulongwa. Co cipangi cavo capwile cakupangezela vyuma vavushoko vwavo.

¹⁴ Njambi yange, anuka vyuma vyoshe evi vinjinalingi ku Njuvo yove yakukulemesela.

¹⁵ A simbu ije njamwene vanu va mu Yunda valinakukamuna vushuka a Litangwa Lyakuhwima. Veka vakele nakulongekeya vimbuto a vimulu, na vinyu, na vushuka, na mikuyu, na vyuma vikwavo nakuvitwala ku Yelusalema, co njavanangwile ngeci kesi valandese cuma cimo a Litangwa Lyakuhwima.

¹⁶ Vanalume vamo vatundile ku nganda ya Tile vakele mu Yelusalema, co vanenele visi na vyuma vyakuliseza-seza nakuvilandesa kuli vanu vetu mu nganda a Litangwa Lyakuhwima.

¹⁷ Co njaluvalele na vantwama va vaYunda njendekele ngwange, “Kengeni, mulinakulinga vuvi! Mulinakuviisa Litangwa Lyakuhwima.

¹⁸ Eci cikeco cahisilile Njambi vakukulwila veni, omo wanenele vukalu a nganda eyi. Co anga mucili nakunena lalo vukalu vwa Njambi ali vaIsalele akuviisa Litangwa Lyakuhwima.”

¹⁹ Ngecivene, njashikile lishiko lyakushoka vikolo vya ku nganda akushangumuka kwa Litangwa Lyakuhwima, ku simbu ya cingwezi omo litangwa lishangumuka kutoka, co kesi kuvishokolola lalo noo Litangwa Lyakuhwima linahu. Njaakele vanu vange vamo ku vikolo vamone ngeci nacimo cuma civakanena mu nganda a Litangwa Lyakuhwima cai.

²⁰ Ngecivene, vaka-kulandesa vyuma vyakuliseza-seza, valalele anja ku vivumbe vya Yelusalema lumo nambe luvali a litangwa lyamucitanu.

²¹ Co njavanangwile nakuvaleka ngwange, “Omwo vikajo mulinakulalela ku civumbe? Nga mukelukilamo lalo, co njakumitundisako na nzili.” Kutunda aje kuvezileko lalo a Litangwa Lyakuhwima.

²² Njashikile vaLevi ngeci valijelese, na kuya mukunyunga ku vikolo, nakumona ngeci Litangwa Lyakuhwima linapu lyakujela. Njanuke Yove Njambi, a eci lalo, njiteteleko omwo cizemo cove cakama manene.

²³ Co a simbu ije lalo, njawanene ngeci vanalume va vaYunda vavangi vambatele vanakazi va ku Ashendonde, na ku Amoni, na ku Mowavi.

²⁴ Vana vavo vamo vendekele ndaka ya ku Ashendonde, nambe ndaka ya vanu veka, kuvazivukile kwendeka ndaka yetu.

²⁵ Co njaluvalele na vaje vanalume, nakuvasinga, nakuvapupa, nakuvashutozola vin̄ambu vyavo. Njavasindiiye kulisinga mu lizina lya Njambi ngeci kesi vakelukilemo lalo vakevo nambe vana vavo kulyambatela na vaka-kwija.

²⁶ Co njavalekele ngwange, “Ava vene vanakazi vaka-kwija vakevo valingisile Mwene Solomoni vuvi. Wapwile munalume muka-nzili kuhyana vimyene voshe va miyati yeka. Njambi wamuzemene, co wamupwisile mwene wa Isalele yoshe, oloni walingile vuvi ovu vene.

²⁷ Kuma netu lalo tukavangeye vilinga vyeni, tujeneke kwononoka Njambi yetu nakwambata vanakazi ava vaka-kwija ndi?”

²⁸ Umo wa vana va Njoyanda muna Elyashimbe Muka-kukombelela Wakama, wambatele muna Sanevalate, wa ku limbo lya Mbete Holone, ngecivene, njamushekele mu Yelusalema.

²⁹ Anuka, yove Njambi, vanu ava vanajwalesa njuvo ya vaka-kukombelela na cikumiiyo ciwalingile na vaka-kukombelela na vaLevi.

³⁰ Ngecivene, njajelesele vanu ku vyuma vyoshe vya vaka-kwija, njavwaeselele vaka-kukombelela na vaLevi mashiko ngeci munu na munu azivuke vipangi vyendi,

³¹ njavwaeselele cimweja vitale vyakupangesa akwenyeka n̄ombelo ije ivakanena a visimbu vije vanemika, na kuli vanu kunena milambu yavo ya vimbuto vyakulivanga, na vushuka vwakulivanga vuje vuvanateje. Anuka vyoshe evi, yove Njambi, nakunjivezikisa.