Nehemiya 12 - Livulu lya Shukulu Kalunga

Mukana wa vaka-kukombelela na vaLevi

¹ Ou ukewo mukana wa mazina a vaka-kukombelela na vaLevi vaje velukile kutunda ku vunzinda na Zelumbambele muna Sheyaletiyele amo na Yoshwa Muka-kukombelela Wakama. Vaka-kukombelela vapwile, Selaya, na Njelemiya, na Ezela,

² na Amaliya, na maluke, na Hatushe,

³ na Shekaniya, na Lehume, na Melemote,

⁴ na Indo, na Nginetoi, na Aviya,

⁵ na Mijamine, na Mandiya, na Mbilenga,

⁶ na Shemaya, na Njoalive, na Njendaya,

⁷ na Salu, na Amoke, na Hilikiya, na Njendaya. Ava vapwile vantwama akati ka vakwavo vaka-kukombelela a matangwa a Yoshwa.

⁸ VaLevi vapwile, Njeshuwa, na Mbinui, na Kandimyele, na Sheleviya, na Yunda, na Mataniya. Vakevo vakele na moko yakwimbisa myaso ya cikandelela.

⁹ Mbekevukiya, na Uno, na vavushoko vwavo vaLevi vakevo vamangele myaso ije vakembi valongisi.

Vatekulwila va Yoshwa Muka-kukombelela Wakama

¹⁰ Yoshwa wapwile ishe ya Njoyakime, Njoyakime wapwile ishe ya Elyashimbe, Elyashimbe wapwile ishe ya Njoyanda,

¹¹ Njoyanda wapwile ishe ya Yonatana, co Yonatana wapwile ishe ya Njandwa.

Vantwama va vikota vya vaka-kukombelela

¹² Omo Njoyakime wapwile Muka-kukombelela Wakama, co mukana wa mazina awa a vaka-kukombelela, vakevo vapwile vakulunu va vikota vya vaka-kukombelela, ku cikota ca Selaya kwatundile Melaya, ku cikota ca Njelemiya kwatundile Hananiya.

¹³ Ku cikota ca Ezela kwatundile Meshulame, ku cikota ca Amaliya kwatundile Njehohanane.

¹⁴ Ku cikota ca Maluke kwatundile Yonatana, ku cikota ca Shembaniya kwatundile Yosefa.

¹⁵ Ku cikota ca Halime kwatundile Andena, ku cikota ca Melemote kwatundile Helekai.

¹⁶ Ku cikota ca Indo kwatundile Zekaliya, ku cikota ca Nginetone kwatundile Meshulame.

¹⁷ Ku cikota ca Aviya kwatundile Zikeli, ku cikota ca Miniyamine, ku cikota ca Moandiya kwatundile Piletai.

¹⁸ Ku cikota ca Mbilenga kwatundile Shamwa, ku cikota ca Shemaya kwatundile Njehonatane.

¹⁹ Ku cikota ca Njoalive kwatundile Matenai, ku cikota ca Yendaya kwatundile Uzi.

²⁰ Ku cikota ca Salai kwatundile Kalai, ku cikota ca Amoke kwatundile Evele.

²¹ Ku cikota ca Hilikiya kwatundile Hashaviya, ku cikota ca Yendaya kwatundile Netanela.

Livulu lya vaka-kukombelela na naanga ya vaLevi

²² Livulu lya vakulunu va naanga ya vaLevi na naanga ya vaka-kukombelela valitulikile a simbu ya kuyoya kwa Vaka-kukombelela ava vakama, Elyashimbe, na Njoyanda, na Yonatana, na Njandwa. Co Livulu eli lyahwile omo Ndalyuse wapwile mwene wa Pelesha.

²³ Vakulunu va naanga ya vaLevi, vavasonekele mu livulu lya mizimbu noo a simbu ya Yonatana, mutekulu wa Elyashimbe.

Kupangezela vipangi vya mu Njuvo ya Shukulu Kalunga

²⁴ Vantwama va vaLevi vapwile, Hashaviya, na Sheleviya, na Njeshuwa, na Mbinui muna kandimyele, co vaLevi vavatepesele mu vimunga vivali vivali vya vaLevi vaje vashangazalele na kukandelela Njambi, kwesekesa ku vilongesa vije vyavaanene Mwene Ndaviti munu wa Njambi.

²⁵ Ava vaka-kunyunga ku Njuvo ya Shukulu Kalunga, vakele na moko ya kunyunga ku milili yakutulikila ya mu Njuvo ya Shukulu Kalunga vapwile, Mataniya, na Mbakevukiya, na Ovandiya, na Meshulame, na Talemone, na Akumbe.

²⁶ Vanu ava vakele a simbu ya Njoyakime, muna Yoshwa mutekulu wa Yehozandake, na a simbu ya Nehemiya nguvulu, na a simbu ya Ezela muka-kukombelela, uje wapwile muka-kulilongesa Mashiko.

Nehemiya akundika civumbe ca nganda

²⁷ Omo vakundikile civumbe ca nganda ya Yelusalema, co vakashakele vaLevi kwoshe kuje kuvakele, ngeci navo vakulipandakane mukulisamba, akukundika nakwimba myaso ya cikandelela, na vingenjo, na tulyalya, na visanzi.

²⁸ Co naanga ya vaLevi vaka-kwimba valikungulwile kutunda ku mitambela ivatungile kuzengeleka Yelusalema, na ku vinganda vije vyazengelekele Netofa,

²⁹ nakutunda ku Mbetengilingale, na ku Ngeva, na ku Azemavete.

³⁰ Co vaka-kukombelela na vaLevi valijelesele vakevo vavenya, na vanu, na vikolo, na civumbe ca nganda.

³¹ Njalamatesele vantwama va vaYunda akamwa ya civumbe, co njaangwile vimunga vivali vyakama vyakele nakuzenguluka mu nganda mu mikana, nakukandelela kuli Njambi. Munga yakulivanga vaile ku cilyo akamwa ya civumbe, kushungama ku Cikolo ca Vyuma vya Mazilo.

³² Co munima ya vaka-kwimba mwakavele Hashaya na litambelo lya vantwama va vaYunda.

³³ Vaka-kukombelela vaje vakele munima vembile malupembo vapwile, Azaliya, na Ezela, na Meshulame,

³⁴ na Yunda, na Mbenjemani, na Shemaya, na Njelemiya.

³⁵ Co wakwatako wapwile, Zekaliya, muna Yonatana mutekulu wa Shemaya. (Vakukulwila vendi lalo vapwile Mataniya, na Mikaya, na Zakule, wa ku cikota ca Asafe.)

³⁶ Vanu vakwavo vamwatele va ku cikota cendi, vapwile, Shemaya, na Azalele, na Milalai, na Ngilalai, na Mai, na Netanela, na Yunda, na Hanani, voshe ava vambatele vivala vyakwimbisa vya muyati uje wakele nakwimbisa Mwene Ndaviti, munu wa Njambi. Ezela muka-kulilongesa Mashiko watwamene kulutwe lwa munga.

³⁷ Co ku Cikolo ca Lisima valamatele a vindendelo vya kuya ku Nganda ya Ndaviti, nakwita ku lipela lya Ndaviti, co velukile ku Cikolo ca Mema, mu ngangela ya nganda.

³⁸ Munga ikwavo yamucivali, vaje vaanene cikandelela vaile ku cimoshwe akamwa ya civumbe, co njavakavele na mbunga imo ya vanu. Twatuvakanene Kaposhi ka Lutengo nakweta ku Civumbe Cakujanjavala,

³⁹ co kutunda kuje twatuvakanene ku Cikolo ca Efalime, na ku Cikolo ca Njeshana, na ku Cikolo ca Visi, na ku Kaposhi ka Hananele, na ku Kaposhi ka Ciita, na ku Cikolo ca Vimanga. Co twasikisilile kuyehi na cikolo ca ku Njuvo ya Shukulu Kalunga.

⁴⁰ Ngecivene, vimunga vyoshe, vije vyaanene cikandelela kuli Njambi vyetele mu mutambela wa ku Njuvo ya Shukulu Kalunga. Amo na vantwama vaje vendele amo nange,

⁴¹ co munga yange yapwile ya vaka-kukombelela vaje vembile malupembo, Elyakime, na Maseya, na Miniyamine, na Mikaya, na Elyoenai, na Zekaliya, na Hananiya,

⁴² co vavakavele kuli Maseya, na Shemaya, na Elyazale, na Uzi, na Njehohanane, na Malekiya, na Elame, na Ezele. Vaka-kwimba vaje vavatwamenene kuli Njezelahiya, vembile nakutambekela manene.

⁴³ A litangwa lije vakombelelele vin̄ombelo vyavingi, co vanu vajolelele manene, omwo Njambi wavavwaelelesele manene. Vanakazi na vanike valipandakanene mukulisamba, valingile muyoyo wakama uje vasele kuuziva kulyala manene.

Kwana vyakulemesa mu Njuvo ya Shukulu Kalunga

⁴⁴ A simbu ije vemikile vanu vaka-kunyunga ku milili yakutulikila milambu ya ku Njuvo ya Shukulu Kalunga, amo na vyavulikumi, na vimbuto vyakulivanga, na vushuka vuje vuvatejele a mwaka na mwaka. Vanu ava vakele na moko yakutambula milambu ku mahya aje akele kuyehi na vinganda vyakuliseza-seza, amo na milambu yakukwasa vaka-kukombelela na vaLevi, kwesekesa ku Mashiko. Vanu voshe va Yunda vavwaelelele na vaka-kukombelela na vaLevi,

⁴⁵ omwo valingile vilika vyakulijelesa na vifutisi vikwavo vije vyashikile Njambi. Vaka-kwimba mu Njuvo ya Shukulu Kalunga, na vaka-kunyunga ku Njuvo ya Shukulu Kalunga, navo lalo vapangele vipangi vyavo kwesekesa ku mashiko aje alingile Mwene Ndaviti na munendi Solomoni.

⁴⁶ Laja a matangwa a Mwene Ndaviti na Asafe muka-kwimba, vaka-kwimba vakele nakutwamenena myaso ya kushangazala, na myaso ya kukandelela kuli Njambi.

⁴⁷ A simbu ya Zelumbambele, na a simbu lalo ya Nehemiya, vanu va Isalele voshe vakele nakwana vwana a litangwa na litangwa vwakukwasa vaka-kwimba na vaka-kunyunga ku Njuvo ya Shukulu Kalunga. Co vanu vaanene mulambu wakujela kuli vaLevi, co vaLevi vaanene mutambela wa vije vishakiwa kuli vaka-kukombelela.