Nehemiya 1 - Livulu lya Shukulu Kalunga

¹ Awa akewo majwi a Nehemiya muna Hakaliya. Mu ngonde ya Kiseleve mu mwaka wamumakumi avali omo Aletasheleshe wapwile Mwene wa Pelesha, yange Nehemiya, njakele mu Susa, nganda yakama.

Nehemiya alinyenga a Yelusalema

² Hanani, umo wa vandolome vange, wezile na vanalume vamo kutunda ku Yunda, co njavehwile vya a Yelusalema na ali vavushoko vwetu vaYunda vaje vasaleleo kuvaile ku vunzinda ku Mbambilone.

³ Co vanjilekele ngwavo vaje vasaleleo kuvaile ku vunzinda, vali mu lifuti lyavo, vali mu vukalu vwakama na shwamwa. Co vanjilekele ngwavo vivumbe vya Yelusalema anga vyawililile, na vikolo lalo kuvavivwaesele, tunde a simbu ije vavyenyekele.

⁴ Omo njazivile vyoshe evi, njatumbamene asi nakulila. Njalilile matangwa amangi kujeneka kulya. Co njalombelele kuli Njambi ngwange,

⁵ “Yove Shukulu Kalunga Njambi wa mwilu! Yove Njambi wakama, wakujujwisa. Yove muka-kunyunga cikumiiyo na cizemo cije kucesi kutenguluka kuli vaje vakuzema nakunyunga mashiko ove.

⁶ Shukulu Kalunga, njikenge, co ziva lilombelo lyange, omo njilinakulombela vutsiki na mutanya ali vangamba vove, vanu va Isalele. Njalitavela ngeci yetu, vanu va Isalele, tunalingi vuvi. Vakukulwila vange, nange tunalingi vuvi.

⁷ Tunalingi vuvi vwakama kuli yove, kutwanyungile mashiko ove, na vizilika vyove, na vilongesa vyove vije viwashikile ngamba yove Mosesa.

⁸ Anuka lijwi lije liwashikile ngamba yove Mosesa ngwove, ‘Nga muvulumuna, co njikamishandwela akati ka vanu va miyati yeka.

⁹ Oloni nga mwiluka kuli yange, nakunyunga mashiko ange nakuwalinga, co nameme mwashandokelele ku shongo ya mafuti aano asi, njikamiilwisa ku mwela uje unjinaangula kupwa wakunjilemesela.’

¹⁰ “Shukulu Kalunga, ava vakevo vangamba vove, na vanu vove vawapatwile na nzili yove yakama.

¹¹ Ngeci ololo Shukulu, tolilila ku lilombelo lya ngamba yove na ku malombelo a vangamba vove, ava vashaka kukusingimika. Vezikisa ngamba yove ku litangwa lya lelo, nakulingisa mwene ngeci anjizivileko mema ku mbunge.” A matangwa aje yange njapwile muka-kwana mwene vinyu.