Ndanyele 7 - Livulu lya Shukulu Kalunga

Cimona ca Ndanyele ca vikashama vawana

NDANYELE ALUMBUNUNA VIMONA VYENDI (7:1–12:13)

¹ Mu mwaka wakulivanga omo Mbeleshazale wapwile mwene wa Mbambilone, njalotele njozi, co njamwene cimona ku vutsiki vuje. Njasonekele ije njozi, co ovu vukevwo vukaleo

² vwa vije vinjamwene ku vutsiki vuje. Njamwene lihunzi lyakele nakuhuwa kutunda ku mitambela yoshe noku-noku, co lyakele nakuhuwa akamwa ya mema a kalunga.

³ Co vikashama vawana vatuukile mu mema a kalunga, cikashama umo na umo wafwile mweka.

⁴ Cikashama wakulivanga wafwile ngwe ndumba, oloni wakele na mambava ngwe a ngonga. Omo njakengeleko, co aje mambava ashutukile. Co uje cikashama vamwimikile, co wemanene lwi ngwe munu. Co vamwanene mana a vunu.

⁵ Co njamwene cikashama mukwavo wamucivali wakulifwa ngwe mbeya wemanene a mendi endi. Washumine vimati vitatu mu kanwa kendi, co vamulekele ngwavo, “Katuka, lya situ yaingi!”

⁶ Omo njakengele, njamwene cikashama mukwavo lalo wafwile ngwe ingwe, oloni a mwongo wendi akele mambava awana ngwe a kazila, co lalo wakele na mitwe iwana. Co vamwanene moko yakushwana.

⁷ Omo njakengele, njamwene lalo cikashama wamuciwana. Ikeye wapwile wa nzili nakukomokesa nakujujwisa. Wakele na mayo a vutale akama, co walile nakuvatozola nakulyatangela vije vyasaleleo. Ikeye kafwile ngwe vaje vikashama vakwavo vatatu embwe, oloni wakele na vimbinga likumi.

⁸ Omo njakele nakuyongola vije vimbinga, co njamwene kambinga kakandondo katuukile akati kavyo. Co kaje kambinga kavatozwele vije vimbinga vitatu vyalivangele. Co kambinga aka kakele na mesho ngwe a munu na kanwa kaje kendekele majwi akulishasha.

Kusompa kwa Njambi

⁹ Njakengele omo vaakele matanda mu myela yawo. Umo uje wakala ku myaka yoshe watumbamene a litanda limo lya akati ka matanda aje. Vuzalo vwendi vwatokele to ngwe memba, vin̄ambu vyendi vyatokele to ngwe kanyange-yange. Litanda lyendi valyakele a mavalo a tuhya aje akele nakwezoka milangi ya tuhya,

¹⁰ co tuhya twakele nakutundililako oku twezoka ngwe mema a mu ndonga. Vanu vavangi-vangi vamupangelele. Co vanu vakupwa 1,000,000 vemanene kulutwe lwendi mukumupangela. Vashangumukile kusompa, co vafukwile mavulu.

¹¹ Omo njakele nakukengelela, co njazivile ije mbinga yaindondo yakele nakwendeka majwi akulishasha. Omo njakengele, co uje cikashama wamuciwana vamutsiile, co muvila wendi vaumbilile mu milangi ya tuhya, co wanyongele.

¹² Vaje vikashama vakwavo vavatundisile nzili yavo, oloni vavatavesele ngeci vayoye simbu yaindondo.

¹³ Mu cimona cange ku simbu ya vutsiki, njamwene umo wakulifwa ngwe munu. Ikeye wakele nakushwenya kuli yange, co mashelwa amuzengelekele, co waile kuli uje wakala ku myaka yoshe.

¹⁴ Co vamwanene moko na kasingimiko na nzili ya vumwene, ngecivene, vanu va ku mafuti oshe na miyati yoshe ya vanu na vanu vaka-kwendeka mu vindaka vyeka vamupangele. Moko yendi ikakala ku myaka yoshe, co vumwene vwendi kuvukahu embwe.

Kulumbununa cimona ca vikashama vawana

¹⁵ Vimona vije njamwene vyanjishotesele manene mbunge, co njakele mu vukalu vwakama.

¹⁶ Ngecivene, njaile kuli umo wa vaje vemanene kuje nakumwihula ngeci anjilumbunwine vyuma vyoshe. Co wanjilumbunwininevyo.

¹⁷ Co wendekele ngwendi, “Vikashama ava vakama vawana vanemanena vumwene vuwana vuje vukakala ano asi.

¹⁸ Oloni vanu va Njambi wa Akamwa ya Akamwa vakatambula vumwene nakuvunyunga ku myaka yoshe.”

¹⁹ Ngecivene, njashakele manene kuzivuka uje cikashama wamuciwana, uje kalifwile na vakwavo voshe, oloni wapwile wakukomokesa, wakele na mayo a vutale na vyala vya vunengu, co wasanyozwele nakulya nakulyatangela vije vyasaleleo.

²⁰ Co njashakele lalo kuzivuka vije vimbinga likumi vije vyakele ku mutwe wendi, na ije mbinga yakele na mesho na kanwa, ije yakele nakwendeka majwi akulishasha. Cifwa cayo capwile cakukomokesa kutuvakana vimbinga vikwavo.

²¹ Omo njakengele, co njamwene ije mbinga yakele nakulwa na vanu va Njambi nakuvafungulula.

²² Asinoni uje wakala ku myaka yoshe wezile, wambulwile kusompa kwakushangazala vanu va Njambi wa Akamwa ya Akamwa. Simbu inete ngeci vanu va Njambi vatambule nzili yakushwana.

²³ Omu mukemwo muvanjilekele muyalumbunukilile ije njozi. “Cikashama wamuciwana nemanena vumwene vwamuciwana vuje vukakala ano asi, vukevwo vukalyangunuka na vumwene vukwavo vwoshe, vukalyatangela kaye koshe nakukatsena.

²⁴ Vije vimbinga likumi vinemanena vimyene likumi vaje vakashwana mu vumwene vuje. Asinoni mwene mukwavo akasholoka, ikeye akalyangunuka na vimyene vakulivanga, co ikeye akafungululao vimyene vatatu.

²⁵ Akalwisa Njambi wa Akamwa ya Akamwa nakuyandesa vanu va Njambi. Ikeye akeseka kutengulula mashiko avo akulemesa, na viwano vyavo, co vanu va Njambi vakakala mwisi yendi myaka itatu na vingonde vitanu na imo.

²⁶ Asinoni mbanja ya mwilu ikatumbama nakusompa, co vakatundisa nzili yendi nakumunyongesa njwa.

²⁷ Nzili na vukama vwa vumwene vwoshe vwa ano asi vakavwana kuli vanu va Njambi wa Akamwa ya Akamwa. Co nzili ya vumwene vwavo kuyikahu, vaka-kushwana voshe va ano asi vakamwononoka nakumupangela.”

²⁸ Aa akeo anahwila majwi. Yange Ndanyele njakele na lyova manene, cihanga cange cafufutukile, co njanyungile majwi oshe awa mu mbunge yange.