Ndanyele 6 - Livulu lya Shukulu Kalunga

Ndanyele vamumbila mu mbulu ya vindumba

¹ Ndalyuse wayongwele kwangula vanguvulu vakupwa 120 ngeci vashwane mu vumwene vwendi vwoshe.

² Co lalo waangwile Ndanyele na vakwavo veka vavali kutwamenena vanguvulu nakukenga ngeci mwene kesi ajeneke vimo.

³ Ngecivene, Ndanyele wamwesele ngeci ikeye asa kupanga mwamuvwa kutuvakana vaje vaka-kutwamenena nambe vanguvulu. Omwo Ndanyele wapangele mwamuvwa vipangi vyendi kutuvakana vakwavo voshe, co mwene wayongwele kumwaka ku vukama vwakutwamenena mu vumwene vwoshe.

⁴ Co vakwavo vaka-kutwamenena na vanguvulu vesekele kuwana cuma cimo cacivi mu ngila ije Ndanyele watwamenenene nayo vipangi mu vumwene, oloni kuvaciwanene, omwo Ndanyele wapwile munu wa kulongwa, co kalingile cuma cimo cacivi.

⁵ Co valyendekesele umo na mukwavo ngwavo, “Kutwasa kuwana cuma cimo cakuhisa naco Ndanyele kuvanga cuma cije cakukundama ku vipangi vya Njambi yendi.”

⁶ Ngecivene, valizivasanene kuya kuli mwene mu vushweke, co omo vetele vendekele nendi ngwavo, “Mwene Ndalyuse, yove shukulu yoya ku myaka yoshe!

⁷ Yetu voshe tulinakutwamenena mu vumwene vwove, vaka-kutwamenena, na vanguvulu, na vaka-kwimanena mu myela ya vanguvulu, na vamyata veka, tunalizivasana ngwetu yove shukulu unapande kwaka lishiko nakulipangesa manene na nzili. Shika ngwove a matangwa makumi atatu naumo wai akalombela kuli njambi weka, nambe kuli munu weka kuvanga kuli yove shukulu. Woshe uje akajomboka lishiko eli vanapande kumumbila mu mbulu ya vindumba.

⁸ Ngecivene, yove shukulu unapande kushika lishiko eli, nakulisoneka, co likakala na nzili ngwe lishiko lya vaMende na vaPelesha lije kuvasa kutengulula.”

⁹ Ngecivene, Mwene Ndalyuse wasonekele lizina lyendi kuje ku lishiko.

¹⁰ Omo Ndanyele wanangukile ngeci lije lishiko mwene nalitava nendi nasonekako, co waile ku njuvo yendi. Co vinjanena vya ku mulili wendi wa akamwa vyakengesele ku Yelusalema. Co watsikamene ku vinjanena vyakushokolola nakulombela kuli Njambi yendi ngwe mwakele nakulinga-linga matangwa oshe.

¹¹ Omo vitozi va Ndanyele vamwene ngeci alinakulombela kuli Njambi,

¹² co voshe vaile amolika kuli mwene nakuvangela Ndanyele. Vendekele ngwavo, “Yove shukulu washikile lishiko nakusonekako ngwove a matangwa makumi atatu woshe akalombela kuli njambi weka nambe ku munu umo, kutuvakana kulombela kuli yove lika, co vakamumbila mu mbulu ya vindumba indi kesi mukemwo?” Co mwene wakumbulwile ngwendi, “Eyo, lishiko eli linapu lyakama manene, lishiko lya vaMende na vaPelesha, lije kuvasa kutengulula.”

¹³ Co valekele mwene ngwavo, “Ndanyele vene, uje cinzinda wa ku Yunda, ikeye kesi nakukusingimika yove shukulu nambe kwononoka lishiko lije liwashikile. Ikeye akalombela visimbu vitatu a litangwa na litangwa.”

¹⁴ Omo Mwene wazivile majwi awa, co wakele na citanga cakama, wayongwele kuwana ngila imo yakwamena Ndanyele. Wesekele manene noo litangwa lyatokele.

¹⁵ Ngecivene, vaje vitozi va Ndanyele velukilile lalo kuli mwene nakumwanukisa ngwavo, “Yove shukulu uzivuka ngeci ngwe ku mashiko a vaMende na vaPelesha, kukwesi lishiko lije lyanashiki mwene lije vasa kutengulula.”

¹⁶ Ngecivene, mwene washikile ngeci vakatwale Ndanyele nakumumbila mu mbulu ya vindumba. Co wendekele kuli Ndanyele ngwendi, “Njambi yove, uje iwapangela simbu yoshe na kulongwa, akwamene.”

¹⁷ Vambatele limanya nakushoka ku cikolo ca mbulu. Co mwene waakele cisateso cendi ca vumwene na cisateso ca vanu vendi va vulemu a limanya lije, ngeci naumo wai ase kwamena Ndanyele.

¹⁸ Co mwene welukile ku lipela lyendi walikelele kulya nambe kutolilila ku myaso yakumuzivisa kuvwaa ije vembile. Co wakele na cilavu-lavu vutsiki vwoshe.

¹⁹ A mungulungengu mwene wendukile, co vwasi-vwasi waile ku mbulu.

²⁰ Omo washwenyele kuyehi, watambekele na lijwi lya vusiwa ngwendi, “Ndanyele, ngamba ya Njambi wakuyoya! Njambi uje iwapangela na kulongwa manene nakwamena ku tunwa twa vindumba ndi?”

²¹ Ndanyele wamukumbulwile ngwendi, “Yove shukulu, yoya ku myaka yoshe.

²² Njambi yange ikeye natumine kangelo kendi kushoka tunwa twa vindumba ngeci kuvasele kunjivulumuna. Ikeye nalingi eci omwo nazivuka ngeci kunjesi na mulonga ku mesho endi, co lalo kunjaviisile cuma cimo kuli yove shukulu.”

²³ Mwene wavwaelelele manene, co washikile ngeci vatundise Ndanyele mu mbulu. Ngecivene, vamutundisilemo oloni vamwene ngeci vindumba kuvamushumine omwo wakulaelele kuli Njambi.

²⁴ Asinoni mwene washikile lishiko ngeci vakwate vaje vanalume voshe vaje vavangelele Ndanyele, co vavanenele nakuvombila mu mbulu ya vindumba, amolika na vanakazi vavo, na vana vavo. Omo simbu kanda vete asi ya mbulu, vindumba vavalile voshe nakumbulukuta vitsiya vyavo.

²⁵ Asinoni Mwene Ndalyuse wasonekelele vanu va ka mafuti oshe na miyati yoshe ya vanu na vanu vaka-kwendeka mu vindaka vyoshe va ano asi ngwendi, “Ciindu kuli yeni voshe!

²⁶ Yange njilinakushika ngwange mu vumwene vwange vwoshe, munu woshe napande kulemesa nakusingimika Njambi ya Ndanyele. “Ikeye Njambi wakuyoya, ikeye akashwana ku myaka yoshe. Vumwene vwendi kuvwesi kunyonga, co nzili yendi kuyesi kuhwa.

²⁷ Ikeye akamena nakupatula, akalingi vikomokeso na vizivukiso mwilu na ano asi. Ikeye wovwele Ndanyele ku tunwa twa vindumba.”

²⁸ Co Ndanyele wavezikile a simbu yashwanene Ndalyuse na a simbu yashwanene Siluse kaPelesha.