Ndanyele 4 - Livulu lya Shukulu Kalunga

Njozi yamucivali ya Nevukaneza

¹ Mwene Nevukaneza watumine lijwi kuli vanu va ku mafuti oshe na miyati yoshe ya vanu na kuli vanu vaka-kwendeka mu vindaka vyoshe mu kaye mwoshe ngwendi, “Ciindu ceni muvavoshe.

² Njilinakumileka vikomokeso na vizivukiso vije vyananjilingila Njambi wa Akamwa ya Akamwa.

³ “Vikomokeso vyakatumwesa Njambi vyapwa vyakama manene! Vizivukiso vyendi vyahyana nzili! Njambi wapwa wa ku myaka yoshe, ikeye akashwana visimbu vyoshe.

⁴ “Yange Nevukaneza, njakele mwamuvwa mu lipela lyange, njajolelele nakuvwaelela manene.

⁵ Oloni njalotele njozi ije yanjizivisile manene lyova, co njamwene vimona a simbu ije njalalele tulo.

⁶ Ngecivene, njashikile vaka-mana voshe va mu Mbambilone ngeci vaije kuli yange vakunjileke muyinalumbunukila eyi njozi.

⁷ Co voshe vaka-kutaa na vaka-manseno na valozi, na vaka-kulukiya vezile, co njavalekele njozi yange, oloni kuvasele kunjilumbunwinayo.

⁸ Asinoni Ndanyele wezile (lizina lyendi likwavo Mbeletesezale, lizina lya njambi yange.) Munzinzime wakujela wa vinjambi wakala muli ikeye, ngeci njamulekele njozi yange ngwange,

⁹ Mbeletesezale, mukulunu wa vaka-mana, njazivuka ngwange, munzinzime wakujela wa vinjambi uli muli yove, uzivuka mahungu oshe. Co njileke muyinalumbunukila njozi yange eyi.

¹⁰ “Omo njalalele, co njamwene cimona cimo ca muti wakama manene wakele mukati ka kaye.

¹¹ Co wakolele nakukula noo waketele ku mashelwa, co munu woshe wa ano asi wasele kuumona.

¹² Maputa awo apwile amavwa, co wemine vushuka vwavungi vuje vwapwilemo mukuvulya kuli munu woshe wa ano asi. Tusitu vahwiminine mu munzinze wawo, co tuzila vatungilile mashwa avo ku minango yawo, co cuma coshe cakuyoya ca ano asi calile ku vushuka vwawo.

¹³ “Oku anga vene njalala, co njamwene kangelo muka-kunyunga watundile mwilu.

¹⁴ Watambekele kuli vakwavo ngwendi, ‘Shinjeni ou muti nakushaja minango yawo, co ukaluleni maputa, nakushandola vushuka vwawo. Shekeni tusitu mwisi yawo, co katuleni tuzila ku minango yawo.

¹⁵ Oloni sezeni nsina yawo yakukuta na lilyenge lya vutale na vunengu mu livu. Isezeni mu lihya mu mwila wakutonola. “ ‘Co lime liwile ali munu ou, akakale amo na tusitu na vimena vya mu shwata.

¹⁶ A myaka itanu na ivali kakakala na mana a vunu, oloni akakala na mana a kasitu.

¹⁷ Ovu vukevwo vutumbe vwa vaje tungelo vaka-kunyunga. Ngecivene, vanu voshe vazivuke ngwavo Njambi wa Akamwa ya Akamwa ali na nzili a vumwene vwoshe vwa vanu, co asa kwana vumwene vuje kuli woshe uje yashaka, nambe ku munu uje wakujeneka vulemu!’ ”

¹⁸ Mwene Nevukaneza wendekele ngwendi, “Eyi ikeyo njozi injalotele. Ngecivene, ololo Mbeletesezale, njileke muyinalumbunukila. Kukwesi umo muka-mana mu vumwene vwange asa kunjilekayo, oloni yove wasa, omwo munzinzime wakujela wa vinjambi uli muli yove.”

Ndanyele alumbununa njozi

¹⁹ Ngecivene, Ndanyele, uje vatumbwile lalo Mbeletesezale walikomokelele ngeci kasele kwendeka cuma cimo. Co mwene wendekele kuli ikeye ngwendi, “Mbeletesezale, kesi utave njozi eyi ikukomokese embwe.” Co Mbeletesezale wakumbulwile ngwendi, “Yove shukulu, nga citava njozi eyi na muje muyinalumbunukila inapande kukundama kuli vitozi vove kesi kuli yove.

²⁰ Muti wapwile waulaja manene ngeci waketele na ku mashelwa vanu voshe va muno mu kaye vaumwene.

²¹ Maputa awo apwile amavwa, co lalo wakele na vushuka vwavungi vwakulisa kaye koshe. Tusitu vahwiminine mwisi yawo, na tuzila vatungilile mashwa avo ku minango yawo.

²² “Ngecivene, yove shukulu, yove unapu muti uje waulaja na nzili. Yove unapu uwakama ngeci nzili yove kuyesi naa ayahwila, vukama vwove vunete ano a kaye oshe.

²³ Omo yove shukulu wakengele, co wamwene kangelo muka-kunyunga watundile mwilu wendekele ngwendi, ‘Shinjeni muti ou nakuunyongesa, oloni sezeni nsina yawo mu livu. Ikuteni na lilyenge lya vutale na vunengu, co isezeni muje vene mu lihya mu mwila. Lime liwile ali munu ou, co akakale kuje vene amo na tusitu noo myaka itanu na ivali!’

²⁴ “Omu mukemwo muyinalumbunukila njozi eyi kuli yove shukulu, co evi vikevyo vikalingiwa kuli yove kulutwe vyanakuleke Njambi wa Akamwa ya Akamwa.

²⁵ Vakakusheka kukutundisa kuli vanu, co ukakala amo na tusitu. Ukalya mwila ngwe ngombe, nakulala anja, co ukajula na lime myaka itanu na ivali. Asinoni ukazivuka ngwove Njambi wa Akamwa ya Akamwa ali na nzili a vumwene vwoshe vwa vanu, co asa kwana vumwene kuli woshe uje yashaka.

²⁶ Co kangelo washikile ngeci ije nsina vaiseze mu livu. Eci cinalumbunuka ngeci ukapwa lalo mwene omo ukatava ngeci Njambi ikeye muka-kushwana kaye koshe.

²⁷ Ngecivene, yove shukulu, tava kunangula kwange. Likele kulinga vuvi, co linga vije vya vushunga. Zivila mema ku mbunge vaka-kuutwa. Co ukakala mwamuvwa simbu yoshe.”

²⁸ Vyuma vyoshe evi vyalingiwile kuli Mwene Nevukaneza.

²⁹ Omo kwetile vingonde likumi na vivali, a simbu wakele nakwendangana akamwa ya lipela lyendi mu Mbambilone,

³⁰ co wendekele ngwendi, “Kengeni vukama vwa Mbambilone! Njaitungile kupwa nganda yange yakama mukumwesa vukama vwange na nzili yange na vumpau vwange na kasingimiko kange.”

³¹ Simbu kanda acimanese kwendeka majwi awa, lijwi lyatundile mwilu lyendekele ngwalyo, “Mwene Nevukaneza, tolilila evi vinjikuleka! Nzili ya vumwene vwove ololo njinaitundisa kuli yove.

³² Vakakusheka kuli vanu, co ukakala amo na tusitu, ukalya mwila ngwe ngombe myaka itanu na ivali. Asinoni ukazivuka ngwove Njambi wa Akamwa ya Akamwa ali na nzili a vumwene vwoshe vwa vanu, co asa kwana vumwene kuli woshe uje yashaka.”

³³ Co a simbu ije vene majwi aje apwile a vushunga. Nevukaneza vamushekele kuli vanu, co wakalile mwila mu shwata ngwe ngombe. Lime lyawililile a muvila wendi, co vin̄ambu vyendi vyapwile vyavilaja, na vyala vyendi vyapwile ngwe vyala vya ngonga.

Nevukaneza ashangazala Njambi

³⁴ “Munima ya myaka itanu na ivali, yange Nevukaneza, njakengele kwilu, co mana ange elukile lalo kuli yange vavenya. Njashangazalele Njambi wa Akamwa ya Akamwa, njashangazalele nakusingimika uje wakala ku myaka yoshe. “Ikeye akashwana ku myaka yoshe, vumwene vwendi vukakala simbu yoshe.

³⁵ Akakenge a vanu va ano asi kupwa vangoco, tungelo va mwilu na vanu va ano asi vali mwisi yendi. Naumo wai asa kumuvindika nambe kwihula vije vyalinga.

³⁶ “Omo mana ange elukile kuli yange vavenya, co kasingimiko kange na vukama vwange na vumpau vwange vyelukile kuli yange vavenya lalo. Co vamyata vange na vaka-vulemu vange vanjitambwile mwamuvwa, co njelukilile lalo a vumwene vwange, na kasingimiko kakama manene kutuvakana akulivanga.

³⁷ “Ngecivene, ololo, yange Nevukaneza njishangazala nakusingimika nakulemesa Njambi ikeye Mwene wa Lilu. Vyuma vyoshe vyakalingi vyapwa vya vushunga, co vingila vyendi vyapwa vya kulongwa, co akononwesa uje woshe alyalesa.”