Ndanyele 2 - Livulu lya Shukulu Kalunga

Njozi ya Nevukaneza

¹ Mu mwaka wamucivali omo Nevukaneza wapwile mwene, co walotele njozi. Njozi ije yamuyandesele manene ngeci kasele kulala tulo.

² Ngecivene, washikile ngeci vakasane vaka-kulukiya, na vaka-manseno, na vimbanda, na valozi ngeci vakumulumbunwine njozi yendi. Omo vezile nakwimana ku mesho a mwene,

³ co mwene wavalekele ngwendi, “Njaloto njozi ije ilinakunjiyandesa manene. Njishaka njizivuke muyinalumbunukila.”

⁴ Co vakevo vakumbulwile mwene mu ndaka ya ciAlamaike ngwavo, “Yove shukulu yoya ku myaka yoshe! Tuleke njozi yove, co tukakulumbunwinayo.”

⁵ Co mwene wendekele kuli vakevo ngwendi, “Njayongola laja ngwange, nga kumunjileke njozi yange na muje muyinalumbunukila, co njikashika ngeci vamitetange vipuka-vipuka nakunyongesa vinjuvo vyeni.

⁶ Oloni nga munjileka eyi njozi na muje muyinalumbunukila, co njikamyana vwana vwakukomokesa na kasingimiko kakama. Ngecivene, njilekeni eyi njozi na muje muyinalumbunukila.”

⁷ Co vakevo vakumbulwile mwene lalo ngwavo, “Nga yove shukulu utuleka njozi yove, co tukakulumbunwinayo.”

⁸ Co aje vene mwene watambekele ngwendi, “Ngwe munjayongwele vene! Yeni mulinakushaka lika kumbila simbu, omwo munamono ngeci ovu vukevwo vutumbe vwange vwakuminyanyamesa yeni voshe

⁹ nga kumunjileke eyi njozi. Mwalizivasana laja akati keni kunjikwisa noo njikatengulula viyongola vyange. Njilekeni njozi, co njikazivuka ngwange kuma mwasa kunjileka lalo muyinalumbunukila.”

¹⁰ Co vaje vaka-kunangula vendekele ngwavo, “Kukwesi munu umo ano asi uje asa kukuleka yove shukulu vije viwushaka kuzivuka. Kukwesi mwene nambe muka-vulemu wa nzili yakama walombele cuma cangacije kuli vaka-kutaa vendi, na vaka-manseno, na valozi.

¹¹ Vije viwalombo yove shukulu vinapu vyavikalu manene vije naumo wai asa kuvilinga kuli yove kuvanga amo vinjambi, oloni vakevo kuvesi kukala akati ka vanu vaka-cisemwa ca ano asi.”

¹² Vacimanese vene kwendeka majwi awa, co mwene waluvalele manene, washikile ngeci vatsiye vaka-kunangula voshe va mu Mbambilone.

¹³ Ngecivene, vashikile lishiko lyakuvatsiya voshe, amolika na Ndanyele na vasamba vendi.

Njambi asholwela Ndanyele kulumbunuka kwa njozi

¹⁴ Asinoni Ndanyele waile kuli Alyoke muka-kushika vaka-kunyunga mwene, uje valekele kutsiya vaka-mana voshe va mu Mbambilone, co Ndanyele wendekele kuli ikeye na mana nakunyanyama ngwendi,

¹⁵ “Omwo vikajo mwene naaka lishiko lyangacije vwasi-vwasi?” Co Alyoke walekele Ndanyele vije vyalingiwile.

¹⁶ Co vwasi-vwasi Ndanyele waile nakulomba lisesa kuli mwene ngeci amwaneko simbu yaindondo lika amuleke muyinalumbunukila njozi.

¹⁷ Omo Ndanyele waile kwimbo, co wakalekeleko vasamba vendi, Hananiya, na Mishaele, na Azaliya vije vyalingiwile.

¹⁸ Co wavalekele ngeci valombele kuli Njambi wa mwilu ngeci avazivileko mema ku mbunge nakumwihula ngeci alumbunune lihungu lya njozi ya mwene kuli vakevo ngeci kesi vavatsiye amolika na vaka-mana voshe va mu Mbambilone.

¹⁹ Co ku vutsiki vuje vene, lije lihungu lya njozi ya mwene lyajombolokele kuli Ndanyele mu cimona, co ikeye walemesele Njambi wa mwilu ngwendi,

²⁰ “Shangazaleni lizina lya Njambi ku myaka yoshe, omwo mana na nzili vyapwa vyendi.

²¹ Akatengulula visimbu na myaka, atumbika vimyene nakutundisa vimyene. Akana mana nakuzivisisa.

²² Akasholola vyuma vyakulova nevi vyakushwekesa, azivuka vije vyakuvanda mu lisusulungu, ceke camuzengeleka.

²³ Njikushangazala nakukusingimika, yove Njambi ya vakukulwila vange. Yove unanjana mana na nzili, unakumbulula lilombelo lyange nakutuleka vije vitukaleka mwene.”

Ndanyele aleka mwene njozi nakumulumbunwinayo

²⁴ Ngecivene, Ndanyele waile kuli Alyoke, uje yashikile mwene kutsiya vaka-mana. Co wendekele kuli ikeye ngwendi, “Kesi uvatsiye embwe. Njitwale kuli mwene ngeci njikamuleke njozi yendi na muje muyinalumbunukila.”

²⁵ Aje vene Alyoke watwalele Ndanyele kuli Mwene Nevukaneza, co walekele mwene ngwendi, “Njinawana umo cinzinda wa ku Yunda uje asa kulumbununa njozi yove shukulu.”

²⁶ Co mwene wendekele kuli Ndanyele (uje lalo ivatumbwile Mbeletesezale) ngwendi, “Wasa kunjileka vinjalotele nakunjilumbunwinavyo ndi?”

²⁷ Co Ndanyele wamukumbulwile ngwendi, “Shukulu, kukwesi valozi, nambe vaka-manseno, nambe vaka-kulukiya, nambe vaka-kulilongesa vya vingongonosi vasa kukuleka vyuma evi.

²⁸ Oloni kwali Njambi lika uje ali mwilu, uje asa kujombolola mahungu. Njozi iwalotele yapwile yakukunangula yove shukulu vyuma vije vikalingiwa kulutwe. Ngecivene, ololo njikuleka njozi yove, na cimona cije ciwamwene omo walalele.

²⁹ “Omo yove shukulu walalele, walotele vyuma vya kulutwe, co Njambi uje akajombolola mahungu, ikeye nakumwesele vije vikasholoka kulutwe.

³⁰ Ngeci lihungu eli valisholwele kuli yange, kesi omwo yange njakala na mana kutuvakana vanu voshe embwe, oloni ngeci yove shukulu ulilongese muyinalumbunukila njozi yove, nakuzivisisa viyongola vije vinaija kuli yove.

³¹ “Yove shukulu, mu cimona cove wamwene kulutwe lwove kunemana kamponya wakama wakuvyazima, co akumukenga azivisa lyova.

³² Mutwe wendi wapwile wa ngolinde yaivwa manene, co nulo yendi na mavoko endi vyapwile vya siliva, mbunda yendi na vinyonga vyendi vyapwile vya vunengu,

³³ mendi endi apwile a vutale, co myanja yendi yapwile yakukumbasana na cikuvo na vuma.

³⁴ Co omo wamukengele, limanya lyakama lyatendukile kujeneka umo kulikwata, lyawililile ku mendi a cikuvo na vuma vya uje kamponya, co vyavujukile.

³⁵ A simbu imolika cije cikuvo, na vuma, na vunengu, na siliva, na ngolinde, vyoshe vyavujukile. Co vyapwile ngwe lijungu lya a lijungwilo lya tiliku a simbu yakumanesa kuteja vimbuto. Co lihunzi lyavipekumwine vyoshe, co naa avyakele ai. Oloni lije limanya lyapupile kamponya lyapwile munkinda wakama uje wafwikile kaye koshe.

³⁶ “Eyi ikeyo njozi. Co njikuleka muyinalumbunukila.

³⁷ Yove shukulu, yove unapu uwakama ku vimyene voshe. Njambi wa mwilu nakupwisa mwene, co nakwana nzili, na kasingimiko.

³⁸ Nakupwisa muka-kushwana vanu voshe va ano asi nakushwana tusitu voshe na tuzila. Yove unemanena mutwe wa ngolinde uje uwamwene mu njozi yove.

³⁹ Munima yove lalo kukakala vumwene vweka, oloni kuvukapu lalo vwakama ngwe vwove embwe, co lalo munima yovu kukakala vumwene vwamucitatu vwa vunengu, vuje vukashwana kaye koshe.

⁴⁰ Asinoni kukakala vumwene vwamuciwana, vukakala na nzili ngwe vutale vuje vukavujula nakutsena vyuma vyoshe. Ngwe vutale muvukavujula nakutsena vyuma vyoshe, co vukavujula nakutsena vumwene vwoshe vuje vwalivangele.

⁴¹ Co lalo wamwene ngeci mendi na manasha vyapwile mutambela umo wa vuma mutambela ukwavo wa vutale. Eci cinalumbunuka ngeci vukevwo vukapwa vumwene vwakulyangunuka. Eci cinalumbunuka ngeci mu vumwene ovu mukakala nzili ngwe ya vutale, omwo vuje vutale vwalikumbasanene na vuma.

⁴² Co manasha aje apwile mutambela umo wa vutale mutambela ukwavo wa vuma cinalumbunuka ngeci mutambela umo wa vumwene ukapwa wa nzili, co mutambela ukwavo ukapwa wakuzeya.

⁴³ Co lalo wamwene ngeci vuje vutale vwalikumbasanene na vuma. Eci cinalumbunuka ngeci vaka-kushwana va vumwene vuje vakakolesa vumwene vwavo akulyambatela, oloni kuvakasa kupwa vumwene vumolika, omwo vutale kuvwasa kulikumbasana amo na vuma.

⁴⁴ A simbu ya vaka-kushwana vaje, Njambi wa mwilu akaka vumwene vuje kuvukahu. Naumo wai akavafungulula, co vukanyongesa vumwene vwoshe, oloni vukevwo vukakala myaka yoshe.

⁴⁵ Co wamwene limanya lije lyatendukile kutunda ku munkinda kujeneka umo kulikwata, co likelyo lyavujwile kaje kamponya kakupanga na vutale, na vunengu, na vuma, na siliva, na ngolinde. Njambi uje wakama alinakukunangula yove shukulu vije vikalingiwa kulutwe. Mwa vushunga njinakulumbunwina mwamuvwa njozi yove, co njinakuleke muyinalumbunukila.”

Mwene ana Ndanyele cikandelela

⁴⁶ Asinoni Mwene Nevukaneza wakulamene ku mesho a Ndanyele nakumwana kasingimiko, co washikile ngeci vakombelele vin̄ombelo kuli Ndanyele.

⁴⁷ Mwene wendekele ngwendi, “Njambi yove wapwa wakama manene kutuvakana vinjambi voshe, ikeye wapwa Shukulu wa akamwa ya vimyene voshe, ikeye akajombolola mahungu. Njazivuka cuma eci omwo unasa kulumbununa lihungu eli.”

⁴⁸ Asinoni mwene waakele Ndanyele ku vukama, co wamwanene vwana vwavungi vwavuvwa, co wamushwanesele mu lifuti lyoshe lya Mbambilone, nakumupwisa mukulunu wa vaka-kunangula voshe va mu Mbambilone.

⁴⁹ Ndanyele walombele kuli mwene ngeci mwene aane Shandelaki, na Meshake, na Ambendenengo moko yakukenga a vyuma vyoshe vya mu lifuti lya Mbambilone, co Ndanyele wakele lika mu mbanja ya vumwene.