Ndanyele 11 - Livulu lya Shukulu Kalunga

¹ “Kangelo muka-kunyunga Isalele. Ikeye wemanene kupwa mukwasi wange na cimpaka cange.

² Co evi vinjikuleka yange ololo vinapu vya vushunga.” Kangelo wendekele ngwendi, “Vimyene vatatu vakashwana Pelesha, co kukakala lalo wamuciwana, ikeye akafuka manene kutuvakana vakwavo voshe. Omo nawana nzili a vufuko vwendi, co akafungulula vumwene vwa Ngelese.

Vumwene vwa Ingito na Silya

³ “Asinoni mwene wa cingenyenye akasholoka. Ikeye akashwana vumwene vwoshe nakulinga cizango cendi.

⁴ Oloni a simbu yendi yakushwana, co vumwene vwendi vukalyangunuka mu mitambela iwana. Co vimyene vaje kesi vatekulwila vendi vakashwana mu lipela lyendi, oloni kuvakakala na nzili ngwe ikeye embwe.

⁵ “Mwene wa Ingito akakala na nzili. Nameme ngoco umo wa vantwama vendi va nzita ikeye akakala na nzili manene, co akashwana vumwene vwakama manene.

⁶ Omo kuneti myaka imo, co mwene wa Ingito akalikwata vusamba na mwene wa ku Silya, co akamwana munendi ngeci amwambate. Oloni vusamba vuje kuvukeshwala embwe, co ikeye na munalume wendi na ishe na vangamba vendi vaje vaile navo voshe vakavatsiya.

⁷ Oloni umo wa ku naanga yendi akapwa mwene. Akalwa nzita na mwene wa Silya, co akakovela mu vimpaka vyavo nakuvafungulula.

⁸ Ikeye akelwisa ku Ingito vifwa vya vinjambi vavo na vivala vya ngolinde na siliva vije vivakundikile ku vinjambi vaje. Munima ya myaka imo ya kwoloka,

⁹ co mwene wa Silya akazengeleka lifuti lya Ingito, oloni akeluka ku lifuti lyendi.

¹⁰ “Vana va mwene wa Silya vakalivwaesela kulwa nzita, co vakakungulula mashwalale vavangi. Umo wavo na mashwalale vendi vakakovela mu lifuti ngwe livazi, co vakalwisa cimpaka ca vitozi vavo.

¹¹ Mwene wa ku Ingito akaluvala, co akalwisa mwene wa ku Silya nakufungulula mbunga yakama ya mashwalale vendi.

¹² Ikeye akalyalesa akuhyana kwendi na a mashwalale vavangi vaje vanatsii, oloni kakahyana lalo.

¹³ “Mwene wa Silya akeluka nakukungulula mashwalale vavangi kutuvakana vaje vakele navo akulivanga. Omo simbu yaivwa iketa, co akeluka na mbunga yakama ya mashwalale vaje vanalivwaesela cimweja vyuma vya nzita.

¹⁴ Asinoni vanu vavangi vakatengulukila mwene wa Ingito. Co vanu vamo vavangi va muuka va ku muyati wove vene Ndanyele, vakatengulukila mwene wa Ingito omwo cimona cije civanamono, oloni vakavafungulula.

¹⁵ Ngecivene, mwene wa Silya akalundula mukinya ku cimpaka ca nganda nakuyifungulula. Mashwalale va Ingito kuvakalu lalo nzita, nameme vene mashwalale vaka-kulwa manene kuvakakala na nzili lalo yakulwa nzita.

¹⁶ Oloni mwene wa Silya akalinga cizango cendi kuli vakevo, naumo wai akamuyeluwisa. Akemana mu Lifuti lya Cikulaeso, co lyoshe likapwa lyendi.

¹⁷ “Mwene wa Silya akayongola kwija na mashwalale vendi voshe. Co mukuyongola kunyongesa vumwene vwa citozi cendi, akalikwata nendi vusamba, nakumwana munendi ngeci amwambate, oloni viyongola vyendi kuvikahyana embwe.

¹⁸ Munima yevi akalwisa miyati ije ili ku mema a kalunga, co akafungulula vanu vavangi. Oloni ntwama uje muka-kwija akamufungulula nakumanesa kapopolwezi kendi. Mwa vushunga kapopolwezi kendi kakamwilukila ikeye vavenya.

¹⁹ Co mwene akeluka ku vimpaka vya mu lifuti lyendi, oloni vakamufungulula, co oku kukapwa mamaneselelo endi.

²⁰ “Co mwene mukwavo akashwana munima yendi, ikeye akatuma ntwama yendi wa mukulunu mukuyandesa vanu ngeci vafwete lisimu awezelele ku vufuko vwa mu vumwene vwendi. Mu simbu yaindondo lika, uje mwene vakamutsiya, oloni kesi citona-mesho nambe kesi mu nzita.”

Mwene wamuvi wa Silya

²¹ Co uje kangelo wakele nakulumbununa ngwendi, “Mwene wa Silya mukwavo akapwa mwene wamuvi uje kapwilemo mukupwa mwene, oloni akaija cishitumukila, co akakala na nzili na linyanyamena.

²² Woshe akamuyeluwisa nameme vene Muka-kukombelela Wakama wa Njambi vakamunyongesa.

²³ Akulinga lizivasano, akanyanyamena miyati ya vakwavo, co akakala na nzili yakama manene, nameme vene akashwana lika muyati waundondo.

²⁴ Ikeye akalwisa nakutambula lifuti lije lili na vufuko kujeneka kunangula vanu vamwo, co akalinga vyuma vije kuvalingile vakukulwila vendi. Asinoni akapangelako vaka-kumukava vivala na vufuko vije vyafungulwile mu nzita. Co akatumba matumbe akulwisa vimpaka, oloni simbu yendi ikahwa.

²⁵ “Co akashangumuna nzita yakama yakulwisa mwene wa Ingito, co nendi lalo akalivwaesela cimweja kulwa nendi nzita yakama na mashwalale vavangi. Oloni mwene wa Ingito vakamunyanyamena, co nendi kakasa kulinga vimo.

²⁶ Vaka-kumunangula vendi vakumwata vakevo vakamuviisa. Mashwalale vendi vavangi vakavatsiya, co mbunga yendi ya nzita vakayinyongesa.

²⁷ Asinoni vimyene vaje vavali vakatumbama amolika nakulya ku mesa imo, oloni viyongola vyavo vikapwa vyavivi, co vakendeka makuli kuli umo na mukwavo. Vyoshe vivakayongola kuvikavakwasa embwe, omwo Njambi ikeye naaka simbu yakuvanyongesa.

²⁸ Mwene wa ku Silya akeluka ku lifuti lyendi na vufuko vwoshe vuje vwanapukula, co akatumba vutumbe vwakumanesa kulemesa kwa vanu va Njambi. Ikeye akalinga mwoshe mwashakela, co akeluka ku lifuti lyendi.

²⁹ “Munima yevi akeluka lalo nakulwisa Ingito, oloni simbu eyi kakahyana ngeci mwahyanene akulivanga.

³⁰ Co vaLoma vakaija na mato akama nakumupopolola, co akakala na lyova. “Asinoni akeluka na vukalu vwakama, co akatumba vutumbe vwakumanesa kulemesa kwa vanu va Njambi. Ikeye akakavangeya kunangula kwa vaje vakatunda kukulemesa oku.

³¹ Mashwalale vendi vamo vakajwalesa Njuvo ya Shukulu Kalunga. Vakavindika kukombelela kwa a litangwa na litangwa, co vakemika Cimweso ca Vunyengwe.

³² Mwene akapangesa makuli mukuwana nzili kuli vanu vaje vanaseza kulemesa kwavo, oloni vanu vaje vakakavangeya Njambi vakakala na nzili yakumuvyana.

³³ Vantwama vaje vali na mana akati ka vanu vakalongesako mana avo vanu vavangi. Oloni mu kasimbu lika vamo vakavatsiila mu nzita nambe kuvenyeka, co vamo vakavevila nakuvapwisa vinzinda.

³⁴ Simbu vacivatsiya, vanu va Njambi vakevo vakatambula vukwasi vumo, nameme vavangi vakalipandakana navo kulingamo omwo cipululu lika.

³⁵ Vantwama vamo va mana vakavatsiya, oloni vutumbe ovu vunapu vwakujelesa vanu. Eci cikalingiwa noo akukotoka, simbu ije yanemika Njambi.

³⁶ “Mwene wa Silya akalinga cizango cendi. Ikeye akalishasha ngwendi napu wakama kutuvakana njambi woshe-iwoshe, co lalo ngwendi ikeye napu wakama kutuvakana Njambi wa Akamwa ya Akamwa. Akalinga eci noo simbu iketa ije Njambi akamunyanyamesa. Njambi akalinga vije vyanayongola.

³⁷ Mwene akayengula njambi uje ivalemesele vakukulwila vendi, co lalo akayengula njambi uje ivazema vanakazi. Mwa vushunga, akayengula njambi woshe-iwoshe, omwo akayongola ngwendi ikeye napu wakama kutuvakana njambi woshe-iwoshe.

³⁸ Oloni akasingimika lika njambi uje wanyunga vimpaka. Co akalambula ngolinde na siliva na mamanya a seo na vufuko vweka vwavuvwa kuli njambi uje kuvalemesele vakukulwila vendi.

³⁹ Akapangesa vaka-kwija vaje vakalemesa njambi weka mukunyunga cimpaka cendi. Akana kasingimiko kakama kuli vaje vamutava ngeci napu muka-kushwana lifuti wa vushunga, co akavana myela ya vulemu mu vumwene vwendi, akavapangezela lifuti lije lyanafungulula kupwa cikandelela akupwa vaka-kulongwa kuli ikeye.

⁴⁰ “Omo simbu ya mamaneselelo ya mwene wa Silya iketa, mwene wa Ingito akamulwisa, co mwene wa Silya akamulwisa na nzili yendi yoshe, akapangesa matemba na tuvalu, na mato akama amangi. Akafungulula mafuti amangi ngwe mema a livazi.

⁴¹ Ikeye lalo akakovelela Lifuti lya Cikulaeso nakutsiya vanu vakupwa 100,000. Oloni mafuti a Endome na a Mowavi na vaje vakasalao kuli Amoni vakevo vakatewa.

⁴² Omo akakovela mu mafuti aje oshe, Ingito nayo kuvakaisezeo.

⁴³ Co akambata vufuko vuvashwekele mu Ingito vwa ngolinde na siliva na vufuko vweka vwa seo vwa mu Ingito. Akahyana lifuti lya Limbiya na Sundane.

⁴⁴ Asinoni muzimbu uje ukatunda mu ngangela na ku kunto ukamuzivisa lyova, co akalwa manene na nzili yoshe, co akatsiya vanu vavangi.

⁴⁵ Akashimbika vimbalaka vyendi vyakama vya vumwene mukati ka mema a kalunga na a munkinda aje ali Njuvo ya Shukulu Kalunga. Oloni akatsa, co naumo wai wakumukwasa akakalako.”