Ndanyele 1 - Livulu lya Shukulu Kalunga

Vakwenje vali mu mbanja ya Nevukaneza

VIN̄ANDA VYA NDANYELE NA VASAMBA VENDI (1:1–6:28)

¹ Mu mwaka wamucitatu omo Yehoyakime wapwile mwene wa mu Yunda, Mwene Nevukaneza wa Mbambilone walwisile Yelusalema nakuzengeleka nganda.

² Shukulu Kalunga watavele Nevukaneza ngeci afungulule Mwene Yehoyakime nakwambata vivala vimo vya mu Njuvo ya Shukulu Kalunga. Co omo Nevukaneza welukile ku Mbambilone, wakaakele vije vivala vyakafungulwile mu mulili wakutulikila wa mu njuvo ya njambi yendi.

³ Co mwene washikile Ashepenaze mwata wa mukulunu, ngeci aangule vamo akati ka vinzinda va vaIsalele vakwenje va ku naanga ya vumwene na ku cikota ca vakulunu va kasingimiko.

⁴ Vakevo vanapande kupwa vavavwa akuvakenga, vakunyanyama, vaje vavalongesa mwamuvwa, vaka-mana mukulilongesa, vakujeneka kapenga ngeci vakapange mu lipela lya mwene. Co Ashepenaze avalongese kulava nakusoneka ndaka ya vaMbambilone.

⁵ Ngecivene, mwene washikile lalo lishiko ngeci a litangwa na litangwa vanapande kuvana vyakulya na vinyu vya cifwa cimo ngwe vije vivalinakwana mwene na naanga yendi. Co omo myaka itatu inahu, vanapande kuvanena kuli mwene nakumupangela.

⁶ Co akati ka vakwenje vaje vavaangwile akele Ndanyele, na Hananiya, na Mishaele, na Azaliya, voshe vapwile va ku muyati wa Yunda.

⁷ Co uje mwata wa mukulunu wavalukile mazina amaha a vaMbambilone. Ndanyele wamulukile Mbeletesezale, Hananiya wamulukile Shandelaki, co Mishaele wamulukile Meshake, co Azaliya wamulukile Ambendenengo.

⁸ Oloni Ndanyele wayongwele mu mbunge yendi ngeci kapandele kulijwalesa ikeye vavenya akulya vyakulya nakunwa vinyu vya vumwene, co walombele Ashepenaze, mwata wa mukulunu ngeci amukwase,

⁹ Njambi walingisile Ashepenaze kukala na mema ku mbunge nakutetela Ndanyele.

¹⁰ Oloni Ashepenaze walekele Ndanyele ngwendi, “Yange njili na lyova kuli shukulu yange mwene, ikeye washikile vimunapande kulya nakunwa, co nga yove kuukanunu ngwe vakweni vakwenje veka, co yange vakanjitapa mutwe.”

¹¹ Ngecivene, Ndanyele waile kuli muka-kunyunga uje yaakele Ashepenaze ngeci anyunge vaje vakwenje vawana.

¹² Co wendekele ngwendi, “Tweseke a matangwa likumi. Twane lika visapa-sapa tulye na mema tunwe.

¹³ Asinoni ukatwesekese amo na vakwenje vaje valinakulya vyakulya vya vumwene, co mwoshe muukamwena mukemwo muukalinga netu.”

¹⁴ Co uje muka-kunyunga watavele Ndanyele na vasamba vendi kuveseka a matangwa likumi.

¹⁵ Omo matangwa likumi aje vavesekele ahwile, vanunile mwamuvwa, co vakele na nzili kutuvakana voshe vaje vakele nakulya vyakulya vije vyavashikile mwene ngeci vavilye.

¹⁶ Ngecivene, uje muka-kunyunga walikelele kuvana vyakulya vya vumwene, co wavanene visapa-sapa.

¹⁷ Ngecivene, Njambi waanene vaje vakwenje vawana mana nakuzivisisa na vutongwe mu vilongesa vyavo. Co lalo waanene Ndanyele mana akulumbununa vimona na vinjozi.

¹⁸ Omo myaka itatu ije yemikile mwene yetele, Ashepenaze watwalele vaje vakwenje voshe kuli Nevukaneza.

¹⁹ Co mwene wendekele navo voshe, kukwakele umo akati ka vakwenje voshe vaje uje wakele na mana ngeci mwa Ndanyele, na Hananiya, na Mishaele, na Azaliya. Ngecivene, vakwenje vaje vawana vapangelele mwene.

²⁰ Co mu vyuma vyoshe vya mana na vyakuzivisisa vije vyavehwile mwene, wavawanene ngeci vaje vakwenje vawana vakele na mana manene visimbu likumi kutuvakana vaka-kutaa nambe vaka-manseno va mu lifuti lyendi lyoshe.

²¹ Co Ndanyele wakele mu mbanja ya vumwene noo Siluse mwene wa Pelesha wafungulwile Mbambilone.