Nahumi 3 - Livulu lya Shukulu Kalunga

¹ Kuvindama kwakama mu nganda muje muli makuli nakulitsiya, nganda ije inashulu na vufuko vuje vuvasa kupukula nakwiva!

² Tolilileni! Ncumo ya likote, nakwoya kwa mavalo a matemba, musindo wa tuvalu, nakujombozoka kwa matemba!

³ Vanalume vaka-kwendela a tuvalu vaya kulutwe mukulwa, mikwale ivyakuma, na makunga avyakuma! Vivimbi vanalundama mutumbo, ije naumo wai asa kuvalava, vanalume valinakutanozokao!

⁴ Cikwizi Nenevayi valinakumunyanyamesa. Wapwile wamuvwa akumukenga, wakele na vyemba vyavushungu wakokweyeye miyati nakuvapwisa vindungo.

⁵ Shukulu Kalunga Muka-nzili yoshe alinakwendeka ngwendi, “Njikakunyanyamesa yove Nenevayi! Njikakushulula wende mutotototo nakutava miyati ya vanu ngeci vakumone, vamone shwamwa yove yoshe.

⁶ Njikakukwita mazilo, co njikakupwisa muka-vunyengwe. Co vanu vakakukenga na vunyengwe.

⁷ Voshe vaje vakakumona vakakutewa na vunyengwe. Vakendeka ngwavo, ‘Nganda ya Nenevayi vanainyongesa! Iyajo amuzivilako mema ku mbunge? Iyajo atava kumuzembeleka?’ ”

⁸ Nenevayi, kuma yove unatuvakana Tevese nganda yakama ya Ingito? Na ikeye lalo wakele na ndonga mukuyinyunga ngwe civumbe, Ndonga ya Nailo yapwile cimpaka cendi.

⁹ Washwanene lifuti lya Sundane na Ingito, kukwesi na aje ahwililile nzili yendi, Limbiya wapwile muka-kumukwasa.

¹⁰ Oloni vanu va ku Tevese vavatwalele mu vunzinda. Vana vavo vavapupile nakuvatsiila a masambwa-ngila. Vanalume vavo va kasingimiko vavakutile malyenge nakuvatwala nakulipangezelavo akati ka vaje vavakwatele.

¹¹ Nenevayi, nove lalo ukapwa mukupenda! Nove lalo ukavomboloka ku vitozi vove.

¹² Co vimpaka vyove vyoshe vikapwa ngwe miti ya mikuyu ili na vushuka vwakulivanga kuhya, nga uningangesa muti, co vushuka vuwila mu kanwa kove!

¹³ Mashwalale vove vanapu ngwe vanakazi, co lifuti lyove kulyesi na cimpaka cakulinyunga ku vitozi vove. Tuhya tukanyongesa mikambo inakikasana ku vikolo vyeni.

¹⁴ Tekwila mema cimweja simbu kanda nganda vaizengeleke, co kolesa vimpaka vyove! Shinga livu ngeci upange ndopi, co vwaesela cimweja mwakutikila ndopi!

¹⁵ Nameme ulinga cuma cika, anga vene vakakwenyeka nambe vakakutsiila mu nzita. Vakakunyongesa ngwe vimbuto vije vivanali vimbimba. Mwatumine manene ngwe vimbimba!

¹⁶ Watumisile manene vaka-kulandulula kutuvakana vingongonosi vya mwilu! Oloni ololo voshe vanai, ngwe vimbimba vaje vajangumuna mambava avo, co vapulula vaya.

¹⁷ Vamyata vove vanafu ngwe njame ya vimbimba vaje vakala a vivumbe omo kunatonola. Oloni omo litangwa lituuka, co vapulula vaya, co naumo wai azivuka kuje kuvanaila!

¹⁸ Mwene wa Asilya, vanguvulu vove na vanu vove va kasingimiko vanatsi! Vanu vove vanashandokela a munkinda, co naumo wai avelwisa lalo kwimbo.

¹⁹ Kukwesi cemba cakukwita a vimbandu vyove caiko, co lalo naumo wai asa kusaka vimbandu vyove. Vaje voshe vaziva muzimbu wakunyonga kwove vajolela nakutwa tuwelele. Naumo wai waputumukile ku muuka wove.