Nahumi 2 - Livulu lya Shukulu Kalunga

Kuwa kwa Nenevayi

¹ Vaka-Nenevayi, valinakumilwisa! Muka-kumilwisa uje ali na nzili yakuminyongesa naija mukumilwisa! Nyungeni civumbe ca nganda! Nyungeni tapalo! Livwaeseleni cimweja nzita!

² (Shukulu Kalunga ashaka kwilwisa lalo vumpau vwa Isalele, ngwe muje muvwakeleko laja simbu kanda vitozi vendi vamupukule.)

³ Vintelo vya mashwalale va vitozi vavikwiti mufwitilo wakuvenga, co vanazala vikoveyo vyakuvenga. Vanalivwaesela kulwa! Co matemba avo avyazima ngwe tuhya, na tuvalu twavo vanalivwaesela cimweja.

⁴ Matemba a tuvalu alinakushatozoka ngwe akuzaluka mu vitapalo, alinakushatozoka noku-noku mu vipango vya nganda. Avyazima ngwe mitetango ya tuhya, nakutumbuka vwasi ngwe muhyato.

⁵ Vamyata valinakuvasana, valinakutanozoka omo vashwenya kulutwe. Vaka-kulwisa vazambwila vwasi ku civumbe nakwaka vintelo vya vyuma vimo vyakulikwasesa kuwisa civumbe.

⁶ Vikolo vili ku ndonga vyashokoloka, mu lipela mwoshe munashulu lyova.

⁷ Vamwene valinakumutwala ku vunzinda, vangamba vendi valinakulinyenga ngwe tumbovo nakulipika ku mitwe kumwesa vusiwa vwavo.

⁸ Vanu vatunda vwasi mu nganda ya Nenevayi ngwe mema atunda mu lishali lyakusita omo linatuvika! Co mutambi ngwawo, “Imaneni! Imaneni!” Oloni naumo wai atenguluka.

⁹ Pukuleni siliva! Pukuleni ngolinde! Nganda inashulu na vufuko!

¹⁰ Nenevayi vanainyongesa, inapu ngundu, ili mupulungwa! Vimbunge vinazeye na lyova, mavuli alinakujaja, nzili inahu, na vihanga vinafufutuka.

¹¹ Ilikulijo ololo nganda ije yapwile ngwe mbulu ya vindumba, mutambela uje vakelenakulila vindumba? Kuje ndumba wa nkomba na ndumba wa lwavo vakele nakuya, co vana vavo vakala kuje kujeneka vushonde?

¹² Ndumba wa nkomba watsiile kasitu, co wamusanyozwelele lwavo lwendi na vana vendi vipuka-vipuka, washulisile mbulu yendi na situ yakusanyozola.

¹³ Shukulu Kalunga Muka-nzili yoshe alinakwendeka ngwendi, “Yange nji citozi ceni! Njikenyeka matemba eni. Mashwalale veni vakavatsiila mu nzita, co njikambata vyuma vyoshe vije vimwambatele kuli vakweni. Co majwi a miluwa veni kuvakawazivi lalo.