Nahumi 1 - Livulu lya Shukulu Kalunga

Vukalu vwa Shukulu Kalunga a Nenevayi

¹ Eli likelyo lijwi lya Shukulu Kalunga a nganda ya Nenevayi. Nahumi uje watundile ku nganda ya Elekoshe, wasonekele vyuma vije Njambi wamumweselevyo mu cimona.

² Shukulu Kalunga Njambi kesi kutavesa vanu vaje valemesa tumponya, akanyanyamesa vaje vamuzinda. Omo vakevo vamuluvalesa, co avalinga shambandinga.

³ Shukulu Kalunga kesi kuluvala vwasi embwe, oloni wakala na nzili, co simbu yoshe akanyanyamesa vanu vaje valinga vyuma vyavivi. Kuje kwoshe kwali nakwendela Shukulu Kalunga, co kukatuka kankumba kakama, mashelwa akewo likungu lije litunda ku mendi endi!

⁴ Ashika mema a kalunga, co auma cau! Alingisa vindonga ngeci viwume cau. Na vulilo vwa Mbashane vuuma cau, Munkinda wa Kalemele uvenguluka, na vishani vya Munkinda wa Lembanone vijujwama.

⁵ Minkinda ininganga ku mesho a Shukulu Kalunga, malundu asangunuka kulutwe lwendi. Asi aninganga omo Shukulu Kalunga asholoka, Kaye na vanu vamwo voshe valijajela.

⁶ Omo naluvala, iyajo asa kuyoya? Iyajo asa kuyoya ku vukalu vwendi vwakama? Etila vukalu vwendi ngwe milangi ya tuhya, mamanya atavozoka apwa likungu ku mesho endi.

⁷ Shukulu Kalunga wapwa wamuvwa, Akamena vanu vendi mu simbu ya tuyando, akanyungu vaje vatengulukila kuli ikeye.

⁸ Akanyongesa vitozi vendi njwa ngwe mulikajalela livazi, atwala ku kutsa vaje vamuyeluwisa.

⁹ Vika mulinakutumba matumbe amavi ali Shukulu Kalunga? Akaminyongesa yeni. Vasa kumuyeluwisa lumolika oloni kesi luvali embwe.

¹⁰ Yeni vaka-kupenda vakamyenyeka ngwe mambimbo akulizenga-zenga na vishati vyakuma!

¹¹ Kuli yove Nenevayi kwatundile munu umo washulile na matumbe amavi, uje watumbile vutumbe vwakulwisa Shukulu Kalunga.

¹² Evi vikevyo vyalinakwendeka Shukulu Kalunga kuli vanu vendi va Isalele ngwendi, “Nameme vaAsilya vatumu manene, nambe vali na nzili, vakanyonga, co vakaziluka. Vanu vange, njamiyandesele, oloni kunjikacilingi lalo embwe.

¹³ Co ololo njikamanesa nzili ya Asilya ali yeni nakuvatula malyenge aje avanamikutu.”

¹⁴ Evi vikevyo vyanashiki Shukulu Kalunga ali vaAsilya ngwendi, “Kuvakakala na vatekulwila vakutwala kulutwe lizina lyavo. Co njikanyongesa tumponya tuje tuli mu vinjuvo vya vinjambi vavo. Njilinakuvwaesa mbumbo ya vaAsilya, kuvapandele kuyoya!”

¹⁵ Kengeni, muluwa alinakwija akamwa ya minkinda mukutunenela muzimbu wauvwa! Alinakwija mukwambulula vyakufungulula Asilya! Ngecivene, vanu va mu Yunda, lisambeni a viwano vyeni, co aneni kuli Njambi vije mwalisingile kumwana. Co vaAsilya vaje vaka-vuvi kuvakalwisa lalo lifuti lyeni. Vanavanyongesa voshe njwa!