Myaso ya Solomoni 8 - Livulu lya Shukulu Kalunga

Munakazi

¹ Tawe, nga wapwile u ndolome yange uje wajamwene ku mavele a vanana, nga njasa kukutsemba, omo njiliwana nove mu tapalo naumo wai ombako mbunge.

² Nga njinakutwala nakukukovelesa mu njuvo ya vanana, kuje unesi kukanjilongesa cizemo, nga njinakwana vinyu vya n̄undu, nga njinakunwisa vinyu vya mapomingilanete.

³ Aka livoko lyove lya cimoshwe kwisi ya mutwe wange, co livoko lyove lya cilyo linjizembeleke.

⁴ Yeni vanakazi va mu Yelusalema, njimilomba ngwange, kesi mwindule cizemo kuvanga noo cikeco vavenya cishaka.

Mwaso wamucitanu na umo Vasamba vavo

⁵ Iyajo ou alinakwija kutunda mu mambo, najendamena ali muka-cizemo cendi? Mwisi ya muti wa apulu njakwindwile, mu mutambela uje muwasemukilile.

Munakazi

⁶ Njake mu mbunge yove ngwe cimweso, ngwe cimweso ca ku livoko lyove. Omwo cizemo cakala na nzili ngwe kutsa, lifuwa lyakala na muuka ngwe vukalo vwa vatsi. Vukalu vwaco vwapwa ngwe milangi ya tuhya twakama.

⁷ Mema amangi kuwasa kuzima cizemo, nambe livazi kulyasa kuvombesa cizemo. Munu naumo wai asa kulanda cizemo, nameme vene na vufuko vwavungi.

Vasamba vavo

⁸ Tuli na ndokazi yetu wa mumbanda wamundondo, mavele endi kanda acikole. Vatijo tukalinga nendi, nga mukwenje akaija nakumuulila?

⁹ Ikeye kapwile civumbe, ngeci tumutungile kaposhi ka siliva. Ikeye lalo kapwile cikolo, ngeci tumushoke na viti vya kendale.

Munakazi

¹⁰ Yange njinapu nji civumbe, cije cinazengeleka nganda, mavele ange anapu ngwe tuposhi twaco. Omo muka-cizemo cange anjikenga, aziva kuvwaelela mu mbunge yendi.

¹¹ Solomoni ali na citungu ca mikolovozi ya vushuka vwa vinyu, ku mutambela uje uvatumbula Mbale Hamone. Kuli vaka-kulima vaje vanakumuna lije lihya kuli ikeye, co munu na munu alinakufweta mavundungulu a siliva akupwa 1,000 kuli Solomoni.

¹² Citungu cange ca mikolovozi ya vushuka vwa vinyu, cinapu cange vavenya, Solomoni asa kutulika mavundungulu a siliva akupwa 1,000, na vaka-kulima vasa kutulika vyuma vyakupwa 200 vije vawana mu mahya avo.

¹³ Yove uli mu citungu, vakweni valinakuvandamena ngeci vazive lijwi lyove, nange njishaka ngeci njizive lijwi lyove.

Munakazi

¹⁴ Zambula muka-cizemo cange, shatuka lumbisi ngwe mbambi, nambe ngwe shonge ashatukila ku minkinda kuje kulinakumena n̄undu.