Myaso ya Solomoni 7 - Livulu lya Shukulu Kalunga

Munalume

¹ Yove unapu u mumbanda wamuvwa manene. Mendi ove anafwila mwamuvwa mu vin̄aku vyove, vinyonga vyove vyapwa vyavivwa ngwe mamanya a seo yakama, vinyonga vyakupanga ku mavoko a muka-vutongwe.

² Muvila wove unapu ngwe lilonga lyakukunama, muje kumwesi vinyu vyakukumbasana. Mbunda yove inapu ngwe mutumbo wa tiliku wakuzengeleka na man̄anda.

³ Mavele ove avali anapu ngwe vishonge vavali, ngwe vana vampasa va mbambi.

⁴ Mukoshi wove unapu ngwe kaposhi ka mayo a njamba, mesho ove anapu ngwe mashali a mu nganda ya Heshevone kuyehi na cikolo ca nganda ya Mbatelavime. Lijulu lyove linapu lyalivwa ngwe Munkinda wa Lembanone akamwa ya nganda ya Ndamasiku.

⁵ Mutwe wove wemana lwii ngwe Munkinda wa Kalemele. Vin̄ambu vyove vyakuvinda vinapu vyavivwa ngwe nanga yakuvenguluka, vuvwa vwayo vupwisa mwene cinzinda.

⁶ Yove muka-cizemo cange uwamuvwa manene. Uwamuvwa manene kutuvakana.

⁷ Citso cove cinapu ngwe muti wa mashakavale, na mavele ove anapu ngwe makasha-kasha a vushuka vwawo.

⁸ Njikalonda ku muti wa mashakavale nakupotola vushuka vwawo, mavele ove anapu ngwe likasha-kasha lya mikolovozi ya vushuka vwa vinyu, muku wove uli na lwengo ngwe maepulu.

⁹ Kanwa kove kanapu ngwe vinyu vyavivwa manene. Vinyu viite mwamuvwa a mulivu wa muka-cizemo cange, viite akamwa ya tunwa twendi na mayo endi.

Munakazi

¹⁰ Njakundama kuli muka-cizemo cange, co ikeye wanjishaka manene.

¹¹ Muka-cizemo cange ija tuye mu shwata, tukakale mu membo vutsiki.

¹² Tukenduka mutondo-tondo nakukenga ku vushuka vwa mikolovozi ya vinyu, tukamone indi inashangumuka laja kujovelela, nga vishani vyawo vinashamwina, nga miti ya mapomingilanete inashamwina shani. Kuje kukekwo njikakumwesela cizemo cange.

¹³ Mandeleke alinakunika lwengo lwaluvwa, ku vikolo vyetu kuli miyati yoshe ya vushuka vwa seo, vushuka vwavuha novu vwalaja, vuje vunjakutulikila yove muka-cizemo cange.