Myaso ya Solomoni 5 - Livulu lya Shukulu Kalunga

Munalume

¹ Njinaija mu citungu cange, ndokazi yange, shombolwa yange. Njilinakukungulula miila na malimangango, njinali vuki vwange, na ngenga yange ya vuki, njinanu vinyu vyange na mavele ange. Vaka-cizemo, lyeni nakunwa noo munapwisamo na cizemo!

Vasamba vavo Mwaso wamuciwana munakazi

² Yange njalalele, oloni njakele nakutona. Njalotele muka-cizemo cange alinakutota ku lipito ngwendi, “Njishokolweleko mwoni wange, wa cikongo cange ca mbunge, liyembe lyange. Mutwe wange unajulu na lime, na vin̄ambu vyange vinajulu na mbundu.”

Munalume Munakazi

³ Njashulula laja vuzalo vwange, omwo vikajo njizalela lalo? Njinajwele laja ku mendi ange, omwo vikajo kukela lizilo lalo?

⁴ Muka-cizemo cange wakovelesele livoko lyendi mu mbengwa ya cikolo, co mbunge yange yamushungwiiye omwo wakele muyehi nange.

⁵ Njendukile nakushokolwela muka-cizemo cange. Njalikwitile miila ku mavoko ange, co milavo yange yakele nakundweka miila ya mema, omo njakwatele liyundo lya cikolo.

⁶ Njashokolwelele muka-cizemo cange, oloni kumuwana nai laja. Njashakele manene kuziva lijwi lyendi! Njamushakezekele, oloni kunjamuwanene, njamusanene, oloni kanjitavele.

⁷ Vaka-kunyunga vaje vakele nakwendangana mu nganda nakunyunga civumbe, vanjiwanene, vanjipupile nakunjitwa mbandu, vatavozwele cikoveyo cange.

⁸ Yeni vanakazi va mu Yelusalema, njikulaeseni ngeci nga muwana muka-cizemo cange, mulekeni ngweni njinazeye na lishungu.

Vasamba vavo

⁹ Munakazi wamuvwa manene kutuvakana vanakazi voshe, omwo vikajo muka-cizemo cove wamushaka manene kutuvakana vakwavo voshe? Vikajo utwihwila ngeci tumuleke muje muulinakuzivila?

Munakazi

¹⁰ Muka-cizemo cange wapwa wamuvwa manene, lalo muvila wendi wapwa wa nzili, endi lika akati ka vanalume 10,000.

¹¹ Mutwe wendi unapu ngwe ngolinde yaivwa manene, vin̄ambu vyendi vinapu vyavilaja, vyakuzivala ngwe likololo.

¹² Mesho endi apwa amavwa ngwe a tutela va ku vana va vindonga, tutela vaje vanemana ku ngenge, nakujwela mu ndonga ije iita na mavele.

¹³ Vinana vyendi vyapwa vyavivwa ngwe citungu muje muli visapa-sapa vyakunika lwengo lwaluvwa manene. Co tunwa twendi twafwa ngwe man̄anda, tulinakundweka miila.

¹⁴ Mavoko endi anapu ngwe makai a ngolinde, akutaleka na mamanya a seo yakama. Muvila wendi unapu ngwe vimbinga vya njamba vyakutaleka na mamanya a safile.

¹⁵ Mendi endi anapu ngwe vimanda vya mamanya akutoka akulambesa, akwimika a vwimaneno vwa ngolinde. Cifwa cendi ngwe Munkinda wa Lembanone, cacivwa manene ngwe miti ya kendale.

¹⁶ Kwendeka kwendi kwakuvwa manene, co ikeye napu wamuvwa mu vyuma vyoshe. Yeni vanakazi va mu Yelusalema, ou ikeye muka-cizemo cange, ikeye musamba wange.