Myaso ya Solomoni 4 - Livulu lya Shukulu Kalunga

Munalume

¹ Kenga, uwamuvwa muka-cizemo cange, mwa vushunga uwamuvwa manene. Mesho ove atemwina cizemo, omo unalifwiki lilesu ku mesho ove. Vin̄ambu vyove vyavilaja vinafu ngwe maka a vimembe vaje vashelumuka kutunda ku malundu a Ngilyande.

² Mayo ove anapu akutoka ngwe vutanga vwa vimanga vakuteula vaje vatunda mukujwela. Mayo ove oshe alimwamuvwa mu kanwa kove, nalimo lyai linapukukamo.

³ Tunwa twove tunapu ngwe vwanda vwakuvenguluka, tunapu twatuvwa omo wendeka, vinana vyove vinalifu na mbazuvwila ya mapomingilanete omo unalifwiki nanga ku mutwe wove.

⁴ Mukoshi wove unapu ngwe kaposhi ka Mwene Ndaviti, kaje kavatunga na vutongwe kuje kwajenjela vintelo vyakupwa 1,000 vya mashwalale va nzili.

⁵ Mavele ove anapu ngwe vana vampasa va vishonge vaje valinakulya akati ka man̄anda.

⁶ Njikakala a lilundu lya miila, a lilundu lya insense, noo litangwa linalauka, co lisusulungu linahu.

⁷ Uwamuvwa muka-cizemo cange, kumwesi kapenga muli yove!

⁸ Ija tuye amo nange tutunde ku Lembanone, shombolwa yange, ija tuye amo nange tutunde ku Lembanone. Shelumuka utunde akamwa ya Munkinda wa Amana, utunde ku Munkinda wa Senile na ku Munkinda wa Helemone, kuje kwakala vindumba na viingwe.

⁹ Unakoko mbunge yange, ndokazi yange, shombolwa yange, unakoko mbunge yange akunjikenga na mesho ove, na sungu yove ije unazala.

¹⁰ Cizemo cove cinanjivwaelelesa, ndokazi yange, shombolwa yange. Cizemo cove cinapu cacivwa manene kutuvakana vinyu, mazi ove a lwengo anatuvakana vyuma vyoshe vyakunika lwengo.

¹¹ Yove shombolwa yange, ku kanwa kove kukandweke ngwe ngenga ya vuki, mavele na vuki vyakala mwisi ya ndaka yove. Vweko vwa vuzalo vwove vunapu ngwe vweko vwa miti ya ku Lembanone.

¹² Ndokazi yange, shombolwa yange, unapu ngwe citungu cakusita, unapu ngwe lisima lyakusita nambe ngwe lisima lya kavwelu-vwelu lyakusita.

¹³ Vimbuto vyove vyapwa ngwe citungu ca miti ya mapomingilanete, muje muli vushuka vwavuvwa, muli hena, na nalende,

¹⁴ na sefelone, na cinyota, na sinamone, na miyati yoshe ya insense, na miila, na malimangango, na miti yoshe ya n̄undu.

¹⁵ Yove u kavwelu-vwelu ka mu citungu, lisima lya mema a mwonyo, vana va vindonga vakwita kutunda ku Munkinda wa Lembanone.

Munakazi

¹⁶ Induka, yove lihunzi lya ku kunto. Huwila mu citungu cange, yove lihunzi lya ku mbwela, shulisamo na lihunzi lya lwengo lwaluvwa. Muka-cizemo cange aije mu citungu cendi nakulya vushuka vwamwo vwavuvwa.