Myaso ya Solomoni 3 - Livulu lya Shukulu Kalunga

Munakazi

¹ Ku vutsiki omo njalalele a vulili vwange, njalotele uje injazema! Njamushakezekele, oloni kunjamuwanene.

² Njaile nakwendangana mu nganda, mu vitapalo na mu tungila twatundondo, njashakezekele uje injazema. Njamushakezekele oloni kunjamuwanene.

³ Vaka-kunyunga mu nganda vaje vakele nakwendangana, vanjimwene, co njavehwile ngwange, “Munanjimwenako muka-cizemo cange ndi?”

⁴ Akuvaseza kasimbu kakandondo, njamuwanene uje injazema mu mwonyo wange. Njamukwatele, co kunjatavele kumwecela, noo njamutwalele mu njuvo ya vanana, ku mulili uje vanjikitilile.

⁵ Yeni vanakazi va mu Yelusalema, njikulaeseni lisingeni ali vishonge na vimbambi ngeci kumukendula cizemo, kuvanga noo cikeco vavenya cishaka.

Mwaso wamucitatu Vasamba vavo

⁶ Vikajo vije vilinakwija kutunda mu mambo, vyakufwa ngwe vimanda vya vwisi vilinakunika lwengo lwaluvwa lwa insense na miila, insense yakulandesa vaka-kulandulula?

⁷ Solomoni ikeye alinakwija vanamwambata a litanda lyendi, mashwalale va nzili va mu Isalele vakupwa makumi atanu na limo, vanamuzengeleka.

⁸ Voshe vapwa vaka-kulwa na mikwale vapwa vaka-kukanyama manene mu nzita, munu na munu nalilemeka mukwale a mbunda yendi, mukulinyunga nawo ku vutsiki.

⁹ Mwene Solomoni vamwambatele a litanda lyalivwa, lije vapangele na viti vya ku Lembanone.

¹⁰ Vimanda vyalyo vavifwika na siliva, akamwa yalyo ali nanga yakwoleka na ngolinde. Misato yalyo vaifwika vinanga vyakuvenguluka, vyakutonga mwamuvwa vanakazi va mu Yelusalema vakevo vanaitongo mukumwesa cizemo cavo.

¹¹ Yeni vanakazi va mu Siyone, ijeni mumone Mwene Solomoni. Mwene Solomoni nazala cilongo cije civamuzikile vaina ku mutwe wendi, a litangwa lya vulo vwendi, a litangwa lyakuvwaelela nakujolela kwendi.