Myaso ya Solomoni 2 - Livulu lya Shukulu Kalunga

¹ Yange njinapu shani ya mu lifuti lya Shalone, njinapu lin̄anda lya mu cimbongo ca minkinda.

Munalume

² Ngwe lin̄anda akati ka mambimbo, mukemwo muunafu yove muka-cizemo cange akati ka vanakazi.

Munakazi

³ Ngwe muti wa apulu akati ka miti ya mu shwata, Mukemwo muunafu yove muka-cizemo cange akati ka vakwenje, njizema kutumbama mu munzinze wove, vushuka vwove vutovala mu kanwa kange.

⁴ Wanjikovelesele mu njuvo yove ya ciwano ca kulya, nakunjimwesa cizemo cove.

⁵ Njikolese na likende lya mikolovozi ya vushuka vwa vinyu vwakuma, co njitakamese na maepulu! Njilinakuvinja omwo cizemo.

⁶ Aka livoko lyove lya cimoshwe kwisi ya mutwe wange, co livoko lyove lya cilyo linjizembeleke.

⁷ Yeni vanakazi va mu Yelusalema, njikulaeseni, lisingeni ali vishonge na vimbambi va mu shwata ngeci kumukendula cizemo, kuvanga noo cikeco vavenya cishaka.

Mwaso wamucivali Munakazi

⁸ Njinazivi lijwi lya muka-cizemo cange. Alinakwija nakushatuka a minkinda, alinakushatuka nakujombozoka a malundu aija kuli yange.

⁹ Muka-cizemo cange napu ngwe shonge nambe ngwe muna nava, kenga, nemana kunima ya civumbe ca njuvo yetu. Alinakunjikengela mu njanena nakunjishumbilila mu vimbengwa vya njanena.

¹⁰ Muka-cizemo cange wendekele kuli yange ngwendi, “Induka, muka-cizemo cange, mwoni wange, ija tuye amo.

Munalume

¹¹ Kenga, cisika cinahu, co nyonzi inahu.

¹² Vishani vilinakushamwina mu lifuti. Simbu inete tuzila vaimbe myaso, tutela valinakwimba myaso mu lifuti lyetu.

¹³ Mikuyu ilinakushangumuka kuhya, co miti ya mikolovozi ya vushuka vwa vinyu ilinakushamwina nakunikisa lihunzi lwengo lwaluvwa. Ija, muka-cizemo cange, mwoni wange, ija tuye amo.

¹⁴ Yove unafu ngwe katela uje wakala mu myanzi ya mamanya. Njimwese cihanga cove cacivwa, co njizive lalo lijwi lyove lyalivwa.

¹⁵ Tukwateleni vimbanje, vimbanje vavandondo, simbu kanda vaviise vitungu vya mikolovozi ya vushuka vwa vinyu ije ilinakushamwina.”

Munakazi

¹⁶ Muka-cizemo cange unapu u wange, nange njinapu nji wove, Ulinakulisa matanga ove akati ka man̄anda,

¹⁷ noo lihunzi lya mutondo lihuwa, co lisusulungu lihwa. Ilukamo, muka-cizemo cange pwa ngwe shonge, pwa ngwe muna nava wa a minkinda ya Mbetele.