Myaso ya Solomoni 1 - Livulu lya Shukulu Kalunga

¹ Mwaso wa myaso wauvwa manene wa Solomoni.

Mwaso wakulivanga Munakazi

² Njitsembe na kanwa kove, omwo cizemo cove cacivwa manene kutuvakana vinyu.

³ Mazi ove akuvwava anika lwengo lwaluvwa, lizina lyove linapu ngwe mazi akunika lwengo lwaluvwa. Mukemwo vambanda vakuzema.

⁴ Njiye amo nove, tushatuke lumbisi, pwa mwene yange, co njikovelese mu milili yove. Tuvwaelela nakujolela muli yove, tukashangazala cizemo cove kutuvakana vinyu. Kucikomokesa omwo vambanda voshe vakuzema.

Munakazi

⁵ Yeni vanakazi va mu Yelusalema, nambe njiwakuzivala oloni njiwamuvwa, ngwe vimbalaka vya mu mambo vya ku Kendale, ngwe mavamba a mu lipela lya Solomoni.

⁶ Kesi munjikenge omo njapwa njiwakuzivala, omwo litangwa lyazivalesa cikonde cange, vandolome vange valuvalele nange, co vanjipangesele mu citungu ca mikolovozi ya vushuka vwa vinyu. Co kunjakele na simbu yakulivwaesa.

⁷ Njileke, muka-cizemo cange, kulijo kuukalisila vutanga vwa vimanga vove? Kulijo kuukahwimisila vutanga vwove a simbu ya mutanya? Omwo vikajo njikukengezekela akati ka tunyungi va matanga eka?

Munalume

⁸ Yove uwamuvwa manene akati ka vanakazi, nga kuuzivuka kuje ku mutambela, ya nakukava vutanga vwa vimanga, co lisila vimembe vove kuyehi na vimbalaka vya tunyungi.

⁹ Yove muka-cizemo cange, njinakwesekesa na kavalu wa lwavo wa ku matemba a mwene wa Ingito.

¹⁰ Vin̄ambu vyove vinapu vyavivwa, vinatepukila ku vinana vyove, co vinatepukila ku mukoshi wove ngwe mamanya a seo yakama.

¹¹ Oloni tukakulingila lilyenge lya ngolinde, na vimande vya siliva.

Munakazi

¹² Omwo mwene wakele ku mesa yendi, mazi anjavwavele anikile lwengo lwaluvwa.

¹³ Muka-cizemo cange kuli yange napu ngwe mazi miila, mazi aje ali a nulo yange.

¹⁴ Muka-cizemo cange kuli yange napu ngwe vishani vya ku vitungu vya mikolovozi ya vushuka vwa vinyu vya ku Engendi.

Munalume

¹⁵ Kenga, uwamuvwa, muka-cizemo cange, kenga, uwamuvwa manene, mesho ove anapu ngwe mayembe!

Munakazi

¹⁶ Kenga, uwamuvwa muka-cizemo cange, mwa vushunga uwamuvwa! Vulili vwetu vukapwa mwila wavushompo.

¹⁷ Mikambo ya njuvo yetu ikapwa miti ya kendale, co mashoko etu, akapwa a miti ya kalipi.