Myaso 99 - Livulu lya Shukulu Kalunga

Njambi ikeye Mwene wa Akamwa ya Akamwa

¹ Shukulu Kalunga ikeye mwene, miyati yoshe inapande kujaja! Natumbama a litanda lyendi lya vakelumbi va mambava, asi anapande kundunduma.

² Shukulu Kalunga wapwa wakama mu Siyone, co ikeye ashika vanu voshe.

³ Vashangazale lizina lyendi lya nzili na vukama, ikeye wapwa wakujela!

⁴ Mwene wa nzili wazema vushunga, yove unanena kushungama mu Isalele, kenga ngeci vushunga vulinakulingiwa.

⁵ Shangazaleni Shukulu Kalunga Njambi yetu, mulemeseni a litanda lyendi! Ikeye wapwa wakujela!

⁶ Mosesa na Alone vapwile vaka-kukombelela vendi, Samwele wapwile umo wa vaje valombelele kuli Shukulu Kalunga, co ikeye wakumbulwile malombelo avo.

⁷ Shukulu Kalunga wendekele kuli vakevo mu manda ya lishelwa, vakevo vononokele vukaleo vwa Shukulu Kalunga na mashiko aje avaanene.

⁸ Yove Shukulu Kalunga Njambi yetu, yove wakumbulwile malombelo a vanu vove, wavamwesele ngeci yove wapwa u Njambi muka-kusambesa, oloni omo valingile vuvi yove wavahisile.

⁹ Shangazaleni Shukulu Kalunga Njambi yetu, mulemeseni a lilundu lyendi lyakujela! Omwo Shukulu Kalunga Njambi yetu wapwa wakujela!