Myaso 97 - Livulu lya Shukulu Kalunga

Njambi ikeye Mwene wa Akamwa ya Akamwa

¹ Shukulu Kalunga ikeye mwene! Kaye kavwaelele ngwe vanu! Man̄anda a mu mema a kalunga ajolele ngwe vanu!

² Mashelwa na lisusulungu vinamuzengeleka, co kushungama na vushunga vikevyo vyapwa luvula lwa litanda lyendi.

³ Tuhya tulinakutunda ku litanda lyendi, nakwenyeka vitozi vendi vaje vanamuzengeleka.

⁴ Mihyato ya Shukulu Kalunga itwila ceke a kaye, kaye kamona mihyato, co kajaja.

⁵ Malundu asosonyoka ngwe sela ku mesho a Shukulu Kalunga wa kaye koshe.

⁶ Melu asholola vushunga vwa Shukulu Kalunga, co vanu voshe vamona vumpau vwendi.

⁷ Voshe vaje valemesa tumponya, shwamwa ikavakola, vinjambi voshe va makuli vakatsikama kuli Shukulu Kalunga.

⁸ Yove Shukulu Kalunga omo vanu va Siyone na vanu va Yunda vaziva kusompa kwove kwa vushunga, co vajolela.

⁹ Shukulu Kalunga Muka-nzili yoshe, yove washwana kaye koshe, yove wakala na vumpau kuhyana vinjambi voshe.

¹⁰ Yeni mwazema Shukulu Kalunga munapande kuzinda vuvi, Shukulu Kalunga akanyungu vanu vendi va kulongwa, nakuvapatula ku nzili ya vaka-muuka.

¹¹ Ceke citwila ali vaka-vushunga, nakujolela kukaija ali vaka-kushungama mu vimbunge.

¹² Joleleni muli Shukulu Kalunga yeni voshe vaka-vushunga, anukeni vije vyanalingi Njambi wakujela, co mushangazaleni.