Myaso 96 - Livulu lya Shukulu Kalunga

Njambi ikeye Mwene wa Akamwa ya Akamwa

¹ Imbileni Shukulu Kalunga mwaso wauha! Imbileni Shukulu Kalunga yeni vaka-kaye voshe!

² Imbileni Shukulu Kalunga, shangazaleni lizina lyendi! Ambululeni kwamena kwendi a litangwa na litangwa.

³ Ambululeni vumpau vwendi kuli vanu, na vilinga vyendi vyakukomokesa kuli vanu voshe.

⁴ Shukulu Kalunga wapwa wakama, co vanapande kumushangazala, ikeye lika vanapande kusingimika kuhyana vinjambi voshe.

⁵ Omwo vinjambi voshe va vanu vapwa tumponya lika, oloni Shukulu Kalunga ikeye watangele melu.

⁶ Singimikeni nakushangazala Shukulu Kalunga, nzili yendi na vuvwa vwendi vili mu Njuvo yendi yakujela.

⁷ Shangazaleni Shukulu Kalunga yeni vanu voshe va ano asi, shangazaleni vumpau vwendi na nzili yendi!

⁸ Shangazaleni lizina lya Shukulu Kalunga lya vumpau, neneni milambu, co ijeni mu Njuvo yendi.

⁹ Yeni vaka-kaye voshe tsikameni nakulemesa Shukulu Kalunga, na vuzalo vwakumulemesa navwo, vaka-kaye voshe vajaje ku mesho endi!

¹⁰ Endekeni kuli vanu voshe ngweni, “Shukulu Kalunga ikeye mwene! Kaye anga vakemikilile mu mwela wako kukesi kushwenya embwe, ikeye akasompa vanu voshe mu vushunga.”

¹¹ Melu ajolele, na asi avwaelele, mema a kalunga akume na vyoshe vije vilimo,

¹² mahya avwaelele ngwe vanu, na vije vyoshe vilinakumenamo! Co miti ya mu shwata itambeke nakujolela

¹³ ku mesho a Shukulu Kalunga, omwo aija nakusompa vanu voshe vali ano asi. Akasompa kaye na vanu mu vushunga.