Myaso 94 - Livulu lya Shukulu Kalunga

Njambi ikeye Lyaako wa voshe

¹ Shukulu Kalunga yove wapwa u Njambi muka-kuhisa vaka-vuvi, sholola vukalu vwove!

² Yove lyaako wa vanu voshe, vahise ngwe ku vilinga vyavo!

³ Vaka-vuvi vakavwaelela visimbu vingaijo yove Shukulu Kalunga?

⁴ Mapwepwe vakalyalesa visimbu vingaijo? Visimbu vingai vakavwaelela a milonga yavo?

⁵ Mapwepwe valinakutsena vanu vove yove Shukulu Kalunga, co valinakuvayandesa manene.

⁶ Vatsiya vifwile na visiwa, nakutsiya lalo vangenzi vaje vali mu lifuti lyetu.

⁷ Vendeka ngwavo, “Shukulu Kalunga katumono, Njambi ya Isalele kombuko mbunge!”

⁸ Yongoleni yeni vaka- mana! Eni vikolokomba simbu mukajo mukakala na mana?

⁹ Njambi ikeye watangele matwi etu, co kasa kuziva ndi? Ikeye watangele mesho etu, co kasa kumona ndi?

¹⁰ Ikeye akanyanyamesa vanu, co kuma kasa kuvahisa ndi? Ikeye wapwa mulongisi wa vanu voshe, kuma kasa kuzivuka ndi?

¹¹ Shukulu Kalunga azivuka viyongola vya vanu, azivuka ngeci viyongola vyavo vinapu vyangoco.

¹² Navezika munu uje iwulongesa yove Shukulu Kalunga, munu uje iwulongesa lishiko lyove.

¹³ Ukamwana kuhwima a litangwa lya tuyando, noo vanendi mbulu ya vaka-vuvi.

¹⁴ Shukulu Kalunga kakavyana vanu vendi, nameme kwivala muyati wendi uje wanaangula.

¹⁵ Vushunga vukeluka lalo ku vaka-kulongwa, co voshe vaje vaka-kupanga mwamuvwa vakavukavangeya.

¹⁶ Iyajo wanjikwasele nakulwisa vaka-vuvi? Iyajo wemanene nange nakulwisa vanu vavavi?

¹⁷ Nga Shukulu Kalunga kanjikwasele, nga yange njililaja mu vukalo vwa vatsi.

¹⁸ Njendekele ngwange, “Lindi lyange lyasenutuka,” oloni yove Shukulu Kalunga, cizemo cove cije kucesi kutenguluka canjikolesele.

¹⁹ Omo viyongola mu mbunge yange vyatumine, oloni yove wanjizembelekele nakunjivwaelelesa.

²⁰ Yove kuutava ngeci vaka-vuvi vashwane, vaje vayongola vya muuka nakupokola mashiko,

²¹ vaje vatumba matumbe akulwisa vaka-vushunga, nakuhisa munu wakujeneka mulonga ngeci atse.

²² Oloni Shukulu Kalunga ikeye muka-kunjamena, Njambi yange ikeye muka-kunjinyunga.

²³ Ikeye akavahisa a vilinga vyavo vyavivi, nakuvanyongesa a vuvi vwavo. Shukulu Kalunga Njambi yetu akavanyongesa voshe njwa.