Myaso 91 - Livulu lya Shukulu Kalunga

Njambi ikeye cimpaka cetu

¹ Woshe uje yanamena Shukulu Kalunga, woshe uje yanyunga Muka-nzili yoshe,

² akendeka kuli ikeye ngwendi, “Yove wapwa vutewelo vwange na cimpaka cange! Yove wapwa u Njambi yange, kuli yove njinakulaela.”

³ Mwa vushunga ikeye akakunyunga ku vushonde vwa mu vushweke, na ku mishongo yoshe ya kutsa.

⁴ Ikeye akakufwika mu mambava endi, nakukunyunga mwamuvwa, vushunga vwendi vukakwamena nakukunyunga.

⁵ Ku vutsiki kuukazivi lyova lya vushonde, nambe lyova lya mikili a simbu ya mutanya,

⁶ nambe lyova lya mishongo ije iita ku vutsiki, nambe lyova lya vyuma vije vinyongesa vanu mutanya mwelu.

⁷ Vanu vakupwa 1,000 vakawila kuyehi nove, nameme vanu vakupwa 10,000 vakakuzengeleka, oloni yove kuukavulumuka embwe.

⁸ Yove ukakenga nakumona vaka-vuvi omo vavahisa.

⁹ Omwo Shukulu Kalunga wapwa vutewelo vwove, unalyangwila wa Akamwa ya Akamwa kupwa cimpaka cove,

¹⁰ vuvi navumo vwai vuukamona, nambe mushongo naumo wai ukaija ku njuvo yove.

¹¹ Njambi akashika tungelo twendi nakukunyunga, vakakunyunga kwoshe kuje kuukaya.

¹² Vakakukavwila na mavoko avo, ngeci myanja yove kesi ikatanuke ku mamanya.

¹³ Ukalyatangela vindumba na mashuko, ukalyatangela vindumba va vukalu na manyoka va vushungu vwavuvi.

¹⁴ Njambi nendeka ngwendi, “Njikamena vaje voshe vanjizema, nakunyunga vaje vanjizivuka ngeci yange nji Kalunga.

¹⁵ Omo vatambeka kuli yange, co njivakumbulula omo vali mu tuyando, co njikakala amo navo. Njikavamena nakuvasingimika.

¹⁶ Njikavana cikandelela ca mwonyo wa myaka yoshe, co njikavamena.”