Myaso 90 - Livulu lya Shukulu Kalunga

LIVULU LYAMUCIWANA (Mya 90–106) Lya munu na Njambi

Lilombelo lya Mosesa munu wa Njambi

¹ Shukulu Kalunga, yove simbu yoshe wapwa cimpaka cetu.

² Simbu kanda utange malundu, simbu kanda utange kaye, yove wapwa u Njambi ku myaka yoshe.

³ Yove wilwisila vanu ku livu, co uvelwisila ku livu kuje kuvatundile.

⁴ Myaka yakupwa 1,000 kuli yove inapu ngwe litangwa limo, inapu lika ngwe litangwa lije lineti laja, ngwe cilo cimo ca vutsiki.

⁵ Unyongesa myonyo ya vanu vwasi-vwasi, uvanyongesa oku vanalala. Vakevo vakahwa ngwe mwila wakuma,

⁶ umena mutondo-tondo, oloni ku cingwezi ujujwama, co uma.

⁷ Vukalu vwove vulinakutunyongesa, co kuluvala kwove kulinakutujujwisa.

⁸ Yove wazivuka vuvi vwetu, nameme vuvi vuje tukalingi mu vushweke.

⁹ Vukalu vwove vunakeesa myaka yetu yakuyoya, kuyoya kwetu kunapu kwakundondo manene.

¹⁰ Matangwa akuyoya kwetu apwa myaka makumi atanu na avali, nambe myaka makumi atanu na myaka makumi atatu, nga tucili na nzili, oloni itunenela lika tuyando na vusiwa, mwonyo uhwa vwasi, co tuvavoshe tuziluka.

¹¹ Iyajo azivuka nzili ya vukalu vwove? Vukalu vwove vwapwa vwakama, ngwe lyova lije tukakuzivila.

¹² Tulongese kulava matangwa etu, ngeci tukale na mbunge ya mana.

¹³ Vukalu vwove vukahwa simbu mukajo yove Shukulu Kalunga? Tetela vangamba vove!

¹⁴ A mutondo a mutondo tushulise na cizemo cove cije kucesi kutenguluka, ngeci tuvwaelele nakujolela mukuyoya kwetu kwoshe.

¹⁵ Tuvwaelelese ngwe ku matangwa aje awatuyandesele, ngwe ku myaka ije itwamwene tuyando.

¹⁶ Vilinga vyove visholoke kuli vangamba vove, na vumpau vwove vusholoke ku vatekulwila vetu.

¹⁷ Shukulu Kalunga Njambi yetu, vivezikiso vyove vikale amo netu. Tuvezikise mu vyoshe vije vitulinga.