Myaso 9 - Livulu lya Shukulu Kalunga

Kukandelela kuli Njambi a vushunga vwendi

Mwaso wa Ndaviti

¹ Yove Shukulu Kalunga njikushangazala na mbunge yange yoshe, nakwambulula vyuma vyoshe vyakukomokesa vije viwunalingi.

² Njikaimba nakujolela omwo yove, njikaimba nakushangazala Njambi Muka-nzili yoshe!

³ Vitozi vange vatenguluka nakwiluka munima omo yove usholoka, vashatuka nakuwila asi nakunyonga.

⁴ Utumbama a litanda lyove kupwa lyaako, usompa nakuwana ngeci yange kunjesi na mulonga.

⁵ Uhisa vaka-kujeneka kukulaela, nakunyongesa vaka-vuvi, zimangana mazina avo ku myaka yoshe.

⁶ Vitozi vetu vananyongo simbu yoshe, na vinganda vyavo vinasiwuka, co nalumo lwai lalo vakavanuka.

⁷ Shukulu Kalunga wapwa mwene ku myaka yoshe, natumbama a litanda lyendi mukusompesa.

⁸ Ikeye ashika kaye mwamuvwa, nakusompa vanu mu vushunga.

⁹ Shukulu Kalunga wapwa cimpaka ca vaka-kuyanda, cimpaka cakutewela a simbu ya tuyando.

¹⁰ Voshe vaje vasingimika lizina lyove, vasa kukulaela kuli yove, omwo yove Shukulu Kalunga wapwa wa kulongwa kuli vaje vanakulaela kuli yove.

¹¹ Imbeni myaso yakushangazala Shukulu Kalunga, uje wakala mu Siyone! Lekeni vanu voshe vije vyanalingi!

¹² Njambi akanuka vaje voshe vali mu tuyando, ikeye kesi kwivala mutambi wavo, nambe kwivala kuhisa vaka-milonga.

¹³ Njizivileko mema ku mbunge yove Shukulu Kalunga! Kenga muvali nakunjiyandesela vitozi vange, njamene ku kutsa yove Shukulu Kalunga,

¹⁴ ngeci njikemane ku mesho a vanu va mu Yelusalema, nakuvaleka vyuma vyoshe vije vinjikushangazala navyo. Njivwaelela omwo yove unanjovola.

¹⁵ Vaka-kujeneka kukulaela, vanendi mbulu nakuwilamo. Myanja yavo inatsi mu myeto yavo vavenya.

¹⁶ Shukulu Kalunga nalisholola ikeye vavenya akusompa kwendi kwa vushunga, oloni vaka-vuvi vanatsi mu vilinga vyavo vyavivi.

¹⁷ Kutsa kukekwo mamaneselelo a vaka-vuvi, na voshe vaje vavyana Njambi.

¹⁸ Muka-kujeneka na muka-kuutwa kuvakavevala ku myaka yoshe, nameme cinyangavili cavo kucikanyongo ku myaka yoshe.

¹⁹ Ija, Shukulu Kalunga! Kesi utave munu akuhyane embwe! Imika vaka-vuvi mu mbanja ngeci uvasompe.

²⁰ Vazivise lyova yove Shukulu Kalunga, vazivuke ngeci vakevo vanapu vanu.