Myaso 89 - Livulu lya Shukulu Kalunga

Mwaso a simbu ya tuyando twa muyati

Mwaso wa Etane kaEzela (1 Vim 4:31)

¹ Yove Shukulu Kalunga, simbu yoshe njikaimba vya cizemo cove cije kucesi kutenguluka, co njikambulula kulongwa kwove ku myaka yoshe.

² Omwo cizemo cove cije kucesi kutenguluka cikakalako simbu yoshe. Kulongwa kwove kwakala myaka yoshe ngwe melu.

³ Yove wendekele ngwove, “Njinalingi cikumiiyo na uje injinaangula, njinalisingi na ngamba yange Ndaviti,

⁴ ‘Umo wa vatekulwila vove akapwa mwene, co njikakolesa vumwene vwove simbu yoshe.’ ”

⁵ Shukulu Kalunga melu alinakushangazala vilinga vyove vyakukomokesa, na kulongwa kwove valinakuviimba mu vikungulukilo vya vaka-kujela.

⁶ Shukulu Kalunga naumo wai ali mwilu wakulifwa nove, naumo wai wa vana va vinjambi wakupwa amo nove.

⁷ Yove wapwa wakujujwisa mu munga ya vaka-kujela, co vukama vwove vwapwa vwakukomokesa kuli voshe vaje vali mwilu.

⁸ Shukulu Kalunga Njambi Muka-nzili yoshe, iyajo walifwa nove? Yove Shukulu Kalunga mu vyuma vyoshe yove wapwa wa kulongwa.

⁹ Yove ukashiki mema a kalunga a nzili, omo mankimba ao akatuka yove uwolwesa.

¹⁰ Yove watsenene cikashama Lahave nakumutsiya, wafungulwile vitozi vove na nzili yove yakama,

¹¹ Melu apwa ove, na asi lalo apwa ove, yove watangele kaye na vyuma vyoshe vilimo.

¹² Yove watangele kunto na mbwela, Munkinda wa Tambole, na Munkinda wa Helemone ilinakwimba kuli yove nakujolela.

¹³ Yove u muka-nzili yakukomokesa! Nzili yove yapwa yakama!

¹⁴ Ukashwana vumwene vwove mukushungama na mu vushunga, cizemo cije kucesi kutenguluka na kulongwa visholoka mu vyoshe vije ulinga.

¹⁵ Yove Shukulu Kalunga, vanavezika vanu vaje vakulemesa na myaso, vanu vaje venda mu ceke cove!

¹⁶ Omwo ali yove tulinakujolela litangwa lyoshe, co tulinakukushangazala a vuvwa vwove.

¹⁷ Vumpau vwove vwakama vulinakutwana nzili, omwo akutetela kwove nzili yetu ilinakuwezelelako.

¹⁸ Yove Shukulu Kalunga mwene yetu, u muka-kutunyunga, yove Njambi Wakujela wa Isalele, wapwa u ntelo yetu.

Cikulaeso ca Njambi kuli Ndaviti

¹⁹ Ku san̄ulu wendekele mu cimona kuli vangamba vove va kulongwa ngwove, “Njinakwasa lishwalale wa nzili, njinamwangula akati ka vanu, nakumutsimanesa.

²⁰ Njinaangula ngamba yange Ndaviti kupwa mwene, njinamuvwavesa mazi ange akujela.

²¹ Nzili yange ikakala nendi simbu yoshe, co ikamutakamesa.

²² Vitozi vendi kuvakamufungulula, na vaka-vuvi kuvakamuyandesa.

²³ Njikanyongesa vaka-n̄ole yendi, nakutsiya voshe vaje vamuzinda.

²⁴ Cizemo cange cikakala nendi, co simbu yoshe njikamupwisa muka-nzili.

²⁵ Co njikaamesa vumwene vwendi, kutunda ku Lishali lya Menditelenyani nakweta ku Ndonga ya Yufuleti.

²⁶ Ikeye akendeka kuli yange ngwendi, ‘Yove unapu u tate na Njambi yange, yove unapu u muka-kunjinyunga na muyoyesi wange.’

²⁷ Njikamupwisa munange wa ntwatwa, co akapwa wakama ku vimyene voshe va asi.

²⁸ Cizemo cange cije kucesi kutenguluka cikakala nendi ku myaka yoshe, cikumiiyo cange cikapwa cakukola kuli ikeye.

²⁹ Umo wa vatekulwila va Ndaviti, akapwa mwene simbu yoshe. Vumwene vwendi vukakalako simbu yoshe noo lilu likahwa.

³⁰ “Oloni nga vatekulwila vendi kuvononoka mashiko ange, co nga vavyana vilongesa vyange,

³¹ nga vayengula vizilika vyange, nakujeneka kunyunga mashiko ange,

³² co njikavahisa omo vuvi vwavo, co njikavayandesa omo kupenga-penga kwavo.

³³ Oloni cizemo cange cije kucesi kutenguluka kucikatundu ali Ndaviti, nambe kwonwa kunyunga cikumiiyo cange kuli ikeye.

³⁴ Kunjikapokola cikumiiyo cange kuli ikeye embwe, nambe kutengulula vije vinjinendeka.

³⁵ “Njinalisingi lumo na ku myaka yoshe a lizina lyange lyakujela, nalumo lwai njikendeka makuli kuli Ndaviti!

³⁶ Vatekulwila vendi vakashwana simbu yoshe, co vumwene vwendi vukakala simbu yoshe ngwe litangwa.

³⁷ Vumwene vwendi vukakalako myaka yoshe ngwe ngonde, vukapwa vukaleo vwavuvwa vwa mwilu.”

Mbimbi omwo vanafungulula mwene

³⁸ Oloni yove unaluvala na mwene uje iwangwile, unamuvyana nakumuseza.

³⁹ Unapokola cikumiiyo cove na ngamba yove, co unanyongesa vumwene vwendi njwa.

⁴⁰ Unavujula vivumbe vya nganda yendi, nakusiwula vimpaka vyendi vyakukola.

⁴¹ Voshe vaje vaita mu ngila vapukula vivala vyendi, na miyati ije ili kwoshe-ikwoshe valinakumushendumuna.

⁴² Unaana kuhyana kuli vitozi vendi, co voshe valinakuvwaelela.

⁴³ Kuwamulwililileko mu nzita, co unamwecelela ngeci vamufungulule.

⁴⁴ Unatundisa mulamu wendi, co unombila litanda lyendi asi.

⁴⁵ Unakeesa matangwa a vukwenje vwendi, co unamuzivisa shwamwa.

Lilombelo lyakwamena

⁴⁶ Ukavanda visimbu vingaijo yove Shukulu Kalunga? Ukavanda myaka yoshe ndi? Myaka ingaijo vukalu vwove vukashwama ngwe tuhya?

⁴⁷ Yove Shukulu Kalunga, anuka ngeci simbu yakuyoya kwange inapu yaindondo, omwo vikajo watangelele vanu voshe?

⁴⁸ Munu iyajo asa kuyoya, co akeneke kutsa? Iyajo asa kwamena mwonyo wendi, ku nzili ya vukalo vwa vatsi?

⁴⁹ Shukulu Kalunga cilikulijo cizemo cove cije kucesi kutenguluka? Cilikulijo cikulaeso cije walisingile na Ndaviti?

⁵⁰ Yove Shukulu Kalunga, yange ngamba yove valinakunjishaula, vaka-kujeneka kukulaela valinakunjishaula.

⁵¹ Yove Shukulu Kalunga, vitozi vove valinakushaula mwene uje iwunaangula! Valinakumushaula kwoshe kuje kwaya.

⁵² Shangazaleni Shukulu Kalunga ku myaka yoshe! Ewa! Ewa!