Myaso 88 - Livulu lya Shukulu Kalunga

Lilombelo lyakukwasa

Mwaso wa cikota ca Kola

¹ Yove Shukulu Kalunga Njambi muyoyesi wange, njitambeka kuli yove mutanya na vutsiki.

² Ziva kulomba kwange, tolilila ku mutambi wange!

³ Njili mu tuyando twakama manene, co njili kuyehi na kutsa.

⁴ Njinafu ngwe voshe vaje vatsa laja, co nzili yange yoshe inahu.

⁵ Njinafu ngwe uje ivanombila kuti akati ka vatsi, ngwe uje ivanatsii nalala mu mbumbo, uje iwunevala hivya, uje kuwasa kumukwasa.

⁶ Unanjumbila mu mbumbo yakulova, mu lisusulungu lyakuzivala vwii.

⁷ Vukalu vwove vunanjisindakana manene, ngwe mankimba a mema a kalunga.

⁸ Unanjitundisa ku vasamba vange, co unanjipwisa nji wa vunyengwe kuli vakevo, njinapu nji cinzinda, co kunjasa lalo kuputumuka,

⁹ vusiwa vunazimbisa mesho ange. A litangwa na litangwa njitambeka kuli yove Shukulu Kalunga, co njijundula mavoko ange kuli yove.

¹⁰ Kuma ukamwesa vikomokeso vyove ku vatsi ndi? Kuma vatsi vakasanguka nakukushangazala ndi?

¹¹ Kuma cizemo cove cije kucesi kutenguluka vakacambulula mu mbumbo ndi? Nambe kulongwa kwove vakacambulula mu mutambela uje wa tuyando ndi?

¹² Kuma vikomokeso vyove vakavizivuka mu lisusulungu ndi? Nambe vilinga vyove vyavivwa vakavimona lalo mu lifuti lije ndi?

¹³ Njilomba kuli yove Shukulu Kalunga ngeci unjikwase, co mutondo-tondo lilombelo lyange lyete ku mesho ove.

¹⁴ Omwo vikajo unanjumbilila kuti yove Shukulu Kalunga? Omwo vikajo unanjikengesela nima?

¹⁵ Tunde ku vwanike vwange, njinayanda manene nakweta kuyehi na kutsa, njinazeye na vihiso vyove.

¹⁶ Vukalu vwove vunanjisindakana, kujujwisa kwove kunanjinyongesa.

¹⁷ Litangwa lyoshe vyuma evi vinanjizengeleka ngwe livazi, co vinanjishetula ku mitambela yoshe.

¹⁸ Unanjishondolwesa kuli vasamba vange va a mbunge, co lisusulungu likelyo linapu musamba wange lika.