Myaso 86 - Livulu lya Shukulu Kalunga

Lilombelo lyakukwasa

Lilombelo lya Ndaviti

¹ Njitolilile yove Shukulu Kalunga co kumbulula lilombelo lyange, omwo yange njikautu.

² Njamene, omwo njakuzema, njamene yange ngamba yove uje wakulaela kuli yove.

³ Njizivileko mema ku mbunge, yove Njambi, njikalombela kuli yove litangwa lyoshe.

⁴ Vwaelelesa mbunge ya ngamba yove, yove Shukulu Kalunga malombelo ange ete kuli yove.

⁵ Omwo yove Shukulu Kalunga wapwa uwamuvwa kuli yetu u muka-kusambesa, washula na cizemo cije kucesi kutenguluka kuli voshe vaje valombela kuli yove.

⁶ Tolilila kukulomba kwange yove Shukulu Kalunga, co ziva kutambeka kwange ngeci unjikwase.

⁷ Omo njili mu vukalu njilombela kuli yove, omwo yove ukanjikumbulula.

⁸ Kukwesi weka lalo wakulifwa nove akati ka vinjambi yove Shukulu, kukwesi vipangi vyakulifwa nevi vyove.

⁹ Miyati yoshe iwatangele vakaija nakutsikama kuli yove, co vakashangazala vukama vwove.

¹⁰ Yove uwakama, co ukalingi vyuma vyakukomokesa omwo yove lika u Njambi.

¹¹ Njilongese yove Shukulu Kalunga, ngeci njononoke vushunga vwove, simbu yoshe njipwise muka-vushunga.

¹² Njikakushangazala na mbunge yange yoshe yove Shukulu Kalunga Njambi yange, co njikambulula vukama vwove ku myaka yoshe.

¹³ Omo vukama vwa cizemo cove kuli yange cije kucesi kutenguluka, unanjamena ku kutsa na ku mbumbo.

¹⁴ Yove Njambi, vaka-kulyalesa na vaka-muuka vashaka kunjilwisa nakunjitsiya, vanu vaje kuvesi kumba mbunge kuli yove.

¹⁵ Oloni yove Shukulu Kalunga u muka-kuzivila mema ku mbunge wapwa u Njambi wa ngozi na cizemo, kuwesi kuluvala vwasi, washula na cizemo cije kucesi kutenguluka, u Njambi wa vushunga.

¹⁶ Tengulukila kuli yange nakunjizivilako mema ku mbunge, njitakamese nakunjamena omwo njikupangela, ngwe muvakupangelele vanana.

¹⁷ Njimwese vuvwa vwove Shukulu Kalunga, ngeci vaje vanjizinda vakazive shwamwa, omo vamona ngeci yove unanjikwasa nakunjizembeleka.