Myaso 85 - Livulu lya Shukulu Kalunga

Lilombelo lyakutetela muyati

Mwaso wa cikota ca Kola

¹ Unavezikisa lifuti lyove yove Shukulu Kalunga, unalingisa vyuma vyoshe kupwa vyavivwa ku vatekulwila va Yakomba.

² Yove unasambesa vanu vove ku vuvi vwavo, nakuzimangana kupenga-penga kwavo kwoshe.

³ Unatundisa vukalu vwove vwoshe, co unalikela kuluvala.

⁴ Twamene yove Njambi muyoyesi wetu, co likele kuluvala netu!

⁵ Ukaluvala netu simbu yoshe ndi? Kuma ukatwalao vukalu vwove ku visemwa vyetu vyoshe ndi?

⁶ Tupwise vaka-nzili lalo ngeci yetu vanu vove tujolele muli yove.

⁷ Tumwese cizemo cove yove Shukulu Kalunga, cije kucesi kutenguluka, co twamene.

⁸ Njikatolilila vije vyendeka Shukulu Kalunga Njambi, nakulaesa kwoloka kuli yetu vanu vendi va kulongwa kuli ikeye, nga kutwilukila ku vulema vwetu.

⁹ Mwa vushunga kwamena kwendi kuli muyehi na vaje vamukomoka, ngeci vumpau vwendi vukale mu lifuti lyetu.

¹⁰ Cizemo cije kucesi kutenguluka nakukulaela vikaliwana amolika, co vushunga na kwoloka vikalivumbatela ngwe munu na musamba wendi.

¹¹ Kulongwa kwa munu kutunda ano asi nakweta mwilu, co vushunga vwa Njambi vukakenga asi kutunda mwilu.

¹² Mwa vushunga Shukulu Kalunga, akana vije vyavivwa, co tukateja vimbuto vyavingi mu lifuti lyetu.

¹³ Vushunga vukaya kulutwe lwa Shukulu Kalunga, nakumuvwaesela ngila ngeci endelemo.