Myaso 84 - Livulu lya Shukulu Kalunga

Kushungwiya Njuvo ya Shukulu Kalunga

Mwaso wa cikota ca Kola

¹ Yange njizema Njuvo yove, Shukulu Kalunga Muka-nzili yoshe!

² Njishaka ngeci njikalemo! Njishaka kukala mu Njuvo ya Shukulu Kalunga. Na mbunge yange yoshe njiimba nakujolela kuli Njambi wakuyoya.

³ Nameme tunzilili vanatungu mashwa, na tumbyasa lalo vali mu viteke vyavo, valinakunyungila vana vavo kuyehi na mutula wove, Shukulu Kalunga Muka-nzili yoshe, mwene yange na Njambi yange.

⁴ Vavezika vaje vali mu Njuvo yove, simbu yoshe valinakwimba nakukushangazala!

⁵ Vavezika vanu vaje nzili yavo itunda kuli yove, vanu vaje vimbunge vyavo vili mu vungenzi vwakuya ku Munkinda wa Siyone.

⁶ Akwita mu Cimbongo ca Mbaka, capwile mutambela wa masima a tuvwelu-vwelu, co nyonzi ya musanda yashulisile vingunja vyamwo.

⁷ Omo vakele nakuya vavawezelelele nzili, co munu na munu walisholwele kuli Njambi wa Siyone!

⁸ Ziva lilombelo lyange, Shukulu Kalunga Njambi Muka-nzili yoshe, yove Njambi ya Yakomba.

⁹ Tolilila yove Njambi! Vezikisa mwene yetu, mwene uje iwunaangula!

¹⁰ Litangwa limo lyakukala mu Njuvo yove, lyalivwa kutuvakana matangwa 1,000 akukala kweka, mwamuvwa kuli yange kupwa muka-kunyunga ku cikolo ca njuvo ya Njambi yange, kutuvakana kukala mu membo a vaka-vuvi.

¹¹ Omwo Shukulu Kalunga Njambi wapwa litangwa na ntelo. Ikeye akana ngozi na kasingimiko, ikeye kesi kumina cuma cimo cacivwa, kuli vaje venda mu vushunga.

¹² Yove Shukulu Kalunga Muka-nzili yoshe, vavezika vanu vaje vakulaela kuli yove!