Myaso 83 - Livulu lya Shukulu Kalunga

Lilombelo lyakufungulula vitozi va Isalele

Mwaso wa Asafe

¹ Kesi woloke kuluu embwe yove Njambi, kesi ulisingimike, nambe kesi utumbame kuluu embwe!

² Kenga, vitozi vove vanakukatukila, na vaje vakuzinda vanakutengulukila.

³ Valinakutumba matumbe a mu vushweke akulwisa vanu vove, valinakulinga munga yakulwisa vaje vaunanyungu.

⁴ Vendeka ngwavo, “Tuyeni tunyongese muyati wa Isalele, ngeci kesi kukakale umo akanuke lizina lyawo ku myaka yoshe!”

⁵ Vanalizivasana vutumbe vwavo, vwakukulwisa na munga ya vanu

⁶ va ku Endome na vaIshimaela, na vanu va ku Mowavi na vaHangeli,

⁷ na vanu va ku Ngembale na vanu va ku Amoni, na vanu va ku Amaleke na vanu va ku Filisitiya na vanu va ku Tile.

⁸ VaAsilya navo vanalipandakana navo, nakukwasa vatekulwila va Lote.

⁹ Linga navo ngwe muwalingile kuli va Mindyani, na Sisela na Njavine ku Ndonga ya Kishone.

¹⁰ Wavanyongesele ku Endole, co mivila yavo yavolelele asi.

¹¹ Linga ku vantwama vavo ngwe muwalingile kuli Olemba na kuli Zeve, fungulula vaka-kushwana vavo voshe ngwe muwalingile na Zeva na Zelumuna.

¹² Vaje vendekele ngwavo, “Tutambuleni lifuti lije lyapwile lya Njambi ngeci lipwe lyetu.”

¹³ Vashandole ngwe likungu yove Njambi yange, ngwe vishwashwa vije vipekumuka na lihunzi.

¹⁴ Ngwe tuhya twenyeka shwata ngwe milangi ya tuhya ishwameka malundu,

¹⁵ ngecivene, vapekumune nakuvajujwisa na lihunzi lyove lyakama.

¹⁶ Vazivise shwamwa yove Shukulu Kalunga, noo vatenguluka nakukulemesa.

¹⁷ Vavafungulule nakuvajujwisa ku myaka yoshe, ngeci vanyonge na shwamwa.

¹⁸ Vazivuke ngeci yove lika wapwa Shukulu Kalunga, muka-kushwana kaye koshe!