Myaso 81 - Livulu lya Shukulu Kalunga

Mwaso wa ciwano

Mwaso wa Asafe

¹ Tambekeni nakujolela kuli Njambi muka-kutunyunga, imbeni nakushangazala Njambi ya Yakomba!

² Shangumukeni mwaso nakwimba tumbulumbumba, imbeni myaso yaivwa a tulyalya na a visanzi.

³ Imbeni lupembo omo ngonde itenama, nameme omo ili mukati, na a litangwa lya viwano vyetu.

⁴ Eli likelyo lishiko mu Isalele, oku kukekwo kushika kwakutunda kuli Njambi ya Yakomba.

⁵ Lishiko eli walishikile vanu va Isalele, omo walwisile lifuti lya Ingito. Njazivile lijwi mu muyati uje kunjazivukile, lyendekele ngwalyo,

⁶ “Njatundisile vitele vyakulema a vitsili vyeni, co njamitulile vitele vyeni vya vindopi.

⁷ Omo mwakele mu tuyando mwatambekele kuli yange, co njamyamenene, njamikumbulwile mu lishelwa lyakuluma, co njamyesekele ku masima a tuvwelu-vwelu a ku Meliva.

⁸ Yeni vanu vange tolilileni kukunangula kwange yeni vanu va Isalele, njishaka manene ngeci mutolilile kuli yange!

⁹ Yeni kumwapandele kukala na njambi weka, nambe kulemesa njambi weka embwe.

¹⁰ Yange Kalunga, Njambi yeni, uje wamitundisile mu lifuti lya Ingito. Njilombeni, co njikamyana vyoshe vije munajeneka.

¹¹ “Oloni vanu vange kuvesi nakunjitolilila, Isalele kuvesi nakunjononoka.

¹² Ngecivene, njavatavele kulinga vizango vyavo.

¹³ Nga vanu vange vanjitolililile, nambe nga vanjononokele,

¹⁴ ngwe njafungulwile vitozi vavo voshe, na nzili yange yakama.

¹⁵ Vaje vanjizinda vakatsikama na lyova kuli yange, co cihiso cavo cikapwa ca myaka yoshe,

¹⁶ oloni njikamilisa makende amavwa, nakumikutisa mwamuvwa na vuki vwa mu limanya.”