Myaso 80 - Livulu lya Shukulu Kalunga

Lilombelo lyakwiluka kwa vanu kuli Njambi

Mwaso wa Asafe

¹ Yove Kanyungi ka Isalele, tolilila kuli yetu, tutolilile, yove ntwama ya vutanga. Yove unatumbama akamwa ya vakelumbi,

² sholola nzili yove ku miyati ya Efalime, na Mbenjemani, na Manase! Ija utwamene!

³ Yove Njambi tupwise vaka-nzili lalo! Tukenge na mema ku mbunge ngeci twovoke.

⁴ Yove Shukulu Kalunga Njambi Muka-nzili yoshe, visimbu vingaijo ukaluvala na malombelo a vanu vove?

⁵ Tuyando twetu tunapu ngwe vyakulya vyetu, vusiwa vwetu vunapu ngwe mema akunwa.

⁶ Yove unatava miyati ije inatuzengeleka kutulwisa, vitozi vetu valinakutushaula.

⁷ Yove Njambi Muka-nzili yoshe, tupwise vaka-nzili lalo tukenge na mema ku mbunge ngeci twovoke.

⁸ Twapwile ngwe mukolovozi wa vushuka vwa vinyu uje uwatundisile ku Ingito, washekelemo miyati ya mu Kanana, co waukunine mu lifuti lyavo.

⁹ Wauvwaeselele mwela ngeci ukolelemo, co mizi yawo yaile kwisi manene, yashalavelele mu lifuti mwoshe.

¹⁰ Yashalavele nakufwika malundu, co minango yawo yapwile ngwe miti yakama ya kendale.

¹¹ Minango yawo yashalavele kweta ku Lishali lya Menditelenyani, nakweta lalo ku Ndonga ya Yufuleti.

¹² Omwo vikajo wasiwilile cimpaka cije cazengelekeleko? Co ololo munu woshe aita asa kwiva vushuka vwawo.

¹³ Vyombo valinakuulyatangela na tusitu lalo valinakuulya.

¹⁴ Yove Njambi Muka-nzili yoshe, lingao cuma cimo. Kenga ano asi ngeci umone vije vilinakulingiwa ku mukolovozi ou wa vushuka vwa vinyu!

¹⁵ Muzi uje uwakunine na livoko lyove lya cilyo, mukolovozi wa vushuka vwa vinyu uje uwakolesele yove vavenya!

¹⁶ Vitozi vetu vanautete, vanawenyeka na tuhya, vamwese vukalu vwove nakuvanyongesa!

¹⁷ Nyunga nakwamena vanu vaje vawaangwile, muyati uje uwapwisile wa nzili!

¹⁸ Kutukatenguluka nakutunda kuli yove lalo, tuyoyese, co tukakushangazala.

¹⁹ Yove Shukulu Kalunga Njambi Muka-nzili yoshe! Tupwise vaka-nzili lalo tukenge na mema ku mbunge ngeci twovoke.