Myaso 79 - Livulu lya Shukulu Kalunga

Lilombelo lyakwamena muyati

Mwaso wa Asafe

¹ Miyati yeka vanakovela mu lifuti lyove yove Njambi! Vanajwalesa Njuvo yove yakujela nakuseza Yelusalema mupulungwa.

² Vanaana mivila ya vangamba vove ku tuzila ngeci vailye, na situ ya vaka-kujela vove lalo vanayana ku vikashama ngeci vailye.

³ Vanetila maninga a vanu vove ngwe mema, maninga etile mu Yelusalema mwoshe ngwe mema, co naumo wai wavatsindile.

⁴ Miyati ya vanu vaje vanatuzengeleka valinakutushaula, nakutujola nakutushendumuna.

⁵ Visimbu vingaijo ukaluvala netu yove Shukulu Kalunga? Kuma ukaluvala ku myaka yoshe ndi? Kuma lifuwa lyove likashwama ngwe tuhya ndi?

⁶ Hisa miyati ya vanu vaje kuvakuzivuka, vanu vaje kuvesi kukulemesa!

⁷ Omwo vanatsii vanu vove nakunyongesa lifuti lyove.

⁸ Kesi utuhise omwo ya vuvi vwa vakukulwila vetu, tuzivileko mema ku mbunge, cinyangavili cetu cinahu.

⁹ Tukwase nakutwamena yove Njambi, tupatule nakutusambesa, omwo lizina lyove.

¹⁰ Omwo vikajo miyati vatwihula ngwavo, “Njambi yeni ali kulijo?” Linga shambandinga miyati akutsiya vangamba vove.

¹¹ Tolilila kukukemanga kwa vinzinda, kwete ku mesho ove, na vukama vwa nzili yove, amena vaje vavanatumbwila kutsa.

¹² Shukulu Kalunga hisa miyati lutanu na luvali akukushaula.

¹³ Asinoni yetu vanu vove, vimanga va ku vutanga vwove, tukakukandelela ku myaka yoshe, nakukushangazala visimbu vyoshe.