Myaso 77 - Livulu lya Shukulu Kalunga

Kuzembeleka a simbu ya tuyando

Mwaso wa Asafe

¹ Njikatambeka manene kuli Njambi, njikatambeka manene, co akanjiziva.

² A simbu ya n̄avava njilomba kuli Shukulu Kalunga, vutsiki njijundula mavoko ange nakulombela, oloni kunjalizembelekele.

³ Omo njanuka Njambi, co njilinyenga omo njiyongola, co njizeya manene.

⁴ Yove unanjilalesa cilavu-lavu, njalijujukila manene, ngeci kunjasa kwendeka.

⁵ Njinayongola a matangwa akulaja co njinanuka myaka ya ku san̄ulu.

⁶ Njanukile myaso ku vutsiki, evi vikevyo njalyendekesele mu mbunge yange ngwange,

⁷ “Kuma simbu yoshe Shukulu Kalunga akatuvyana ndi? Kuma kukwesi simbu yakavwaelela netu ndi?

⁸ Kuma cizemo cendi cije kucesi kutenguluka cinahu ndi? Kuma vikulaeso vyendi vinahu ku myaka yoshe ndi?

⁹ Kuma Njambi nevala kukala na mema ku mbunge ndi? Kuma vukalu vwendi vunatundisa kutetela kwendi ndi?”

¹⁰ Asinoni njalyendekesele mu mbunge yange ngwange, “Cuma cakama cilinakunjizivisa ku mbunge kuvavala cinapu ngeci Njambi kesi na nzili lalo.”

¹¹ Shukulu Kalunga, njikanuka vilinga vyove vyakama, mwa vushunga vene njikanuka vikomokeso viwalingile ku simbu ya kunima.

¹² Njikanuka vipangi viwunalingi, nakuyongola vilinga vyove vyoshe vya nzili.

¹³ Vyuma vyoshe viwukalingi yove Njambi vyapwa vyakujela! Njambi mukajo lalo wakama wakuhyana yove Njambi yetu?

¹⁴ Yove u Njambi uje muka-kulinga vikomokeso, yove wamwesele nzili yove akati ka vanu.

¹⁵ Yove wamenene vanu vove vatekulwila va Yakomba na Yosefa, na nzili yove yakama.

¹⁶ Yove Njambi omo mema a kalunga akumwene, co azivile lyova ngwe vanu, na vinzinga vya mema a kalunga vyajajele ngwe vanu.

¹⁷ Mashelwa anyokesele nyonzi, co cililimo calumine mwilu, na mihyato yahyahyatele ku mitambela kwoshe.

¹⁸ Mikalateto ya cilumo cove yasholokele, na mihyato yahyahyatele mu kaye mwoshe, co asi ajajele.

¹⁹ Wendele a mankimba, wajavukile mema a kalunga, oloni myanja yove kuyasholokele.

²⁰ Watwamenenene vanu vove ngwe kanyungi, waangwile Mosesa na Alone kupwa vantwama vavo.