Myaso 76 - Livulu lya Shukulu Kalunga

Njambi Muka-kuhyana

Mwaso wa Asafe

¹ Njambi vamuzivuka mu Yunda, lizina lyendi lyapwa lyakama mu Isalele.

² Limbo lyendi lyakala mu Yelusalema, ikeye wakala a Munkinda wa Siyone.

³ Wapokozwele mikili ya vitozi kuje, na vintelo vyavo, na vimoko vya mukwale, na vitwa vyavo vyoshe vya nzita.

⁴ Vumpau vwove vwapwa vwakukomokesa yove Njambi! Yove uwakama, omo utunda ku minkinda kuje kuwafungulwile vitozi vove!

⁵ Mashwalale vavo va vingenyenye vanavapukula vyoshe vivanakala navyo, co vanalala ngumbanga vanatsi, nzili yavo yoshe na vutongwe vwavo vinapu vyangoco.

⁶ Omo yove Njambi ya Yakomba waluvalele, co tuvalu na vaka-kulondao vawile na kutsa.

⁷ Oloni yove Shukulu Kalunga voshe valinakukukomoka! Iyajo asa kwimana ku mesho ove omo unaluvala?

⁸ Kusompa kwove vacizivukile tunde mwilu, vanu va asi vazivile lyova volokele kuluu,

⁹ omo yove wakatukile nakusompesa, nakwamena voshe vavayandesele va ano asi.

¹⁰ Mwa vushunga nameme vanu vanaluvala vakakushangazala, vaje vanovoka ku vinzita vakanyunga viwano vyove.

¹¹ Aneni Shukulu Kalunga Njambi yeni vije mwamukulaesele, yeni voshe miyati ya muyehi muneneleni vwana. Njambi ikeye imunapande kukomoka.

¹² Ikeye ononwesa vana va vimyene va kulyalesa, nakuzivisa lyova vimyene vakama.