Myaso 75 - Livulu lya Shukulu Kalunga

Njambi ikeye lyaako

Mwaso wa Asafe

¹ Tukukandelela yove Njambi, tukukandelela! Twambulula vukama vwove na vilinga vyove vyakukomokesa viwunalingi!

² Njambi nendeka ngwendi, “Njinemika simbu ya kusompa, co njikasompa mu vushunga.

³ Nambe asi na vyoshe vije vyakalao vijaja, oloni yange njikakolesa luvula lwa asi mbe.

⁴ Njendekele na vaka-kulyalesa ngwange, ‘Kesi mulyalese,’ co na vaka-vuvi ngwange, ‘Kesi mulishashe.’

⁵ Njavalekele ngwange kesi valimwese vukama, co kesi vendeke nakulishasha.”

⁶ Kuhyana kucikatundu mu ngangela nambe mu kangombe ka yambi, nambe ku kunto, nambe mu mbwela,

⁷ Njambi lika ikeye lyaako, ahisa munu umo nakusambesa mukwavo.

⁸ Mu livoko lya Shukulu Kalunga muli nganja inashulu na vinyu vya vukalu vwendi, akavitila asi, co vaka-vuvi voshe vakavinwa nakuvimanesa.

⁹ Oloni yange njikambulula vuvwa vwove ku myaka yoshe, njikakwimbila mwaso wakukushangazala, yove Njambi ya Yakomba.

¹⁰ Ikeye akanyongesa nzili ya vaka-vuvi, oloni akana nzili kuli vaka-vushunga.