Myaso 74 - Livulu lya Shukulu Kalunga

Lilombelo lyakupatula muyati

Mwaso wa Asafe

¹ Omwo vikajo unatusezela yove Njambi? Kuma ukaluvala na vanu vove ku myaka yoshe ndi?

² Anuka vanu vove vaje vawalyangwilile tunde ku san̄ulu, vaje vawatundisile mu vunzinda kupwa muyati wove. Anuka Munkinda wa Siyone limbo lyove!

³ Ija umone Njuvo yove muyinavujuka, vitozi vetu vananyongesa vyuma vyoshe vya mu Njuvo yove.

⁴ Vitozi vove vanatambeka nakuvwaelela mu Njuvo yove, vanashimbika vipandelo kupwa vimweso vyakuhyana.

⁵ Vafwile ngwe vanu vaka-kukanja vinjaviti ku lyumbu lya miti.

⁶ Vatavozwele mavaya oshe akushonga mwamuvwa, na vinjaviti vyavo na vundoma.

⁷ Vanajwalesa Njuvo yove nakuyenyeka.

⁸ Valyendekesele ngwavo, “Tukavanyongesa voshe njwa.” Vanenyeka mitambela yoshe yakujela ya mu lifuti.

⁹ Vizivukiso vyetu vyoshe vyakujela vinahu, co lalo kukwesi vaka-kwimanena vanasalako, naumo wai lalo azivuka simbu ije cuma eci cikahwa.

¹⁰ Yove Njambi visimbu vingaijo, vitozi vetu vakakujola? Kuma vakatwalao kushaula lizina lyove ku myaka yoshe ndi?

¹¹ Omwo vikajo unavyana kutukwasa? Vikajo unelwisila mavoko ove kunima?

¹² Oloni yove Njambi, tunde ku san̄ulu unapu u mwene yetu, unatwamena visimbu vyavingi.

¹³ Wangunwine mema a kalunga na nzili yove, co watavozwele mitwe ya vikashama vya mu mema a kalunga,

¹⁴ yove watsenene mutwe wa cikashama Levyatane, co waanene situ yendi kupwa vyakulya vya tusitu va mu mambo.

¹⁵ Yove watuwisile mema a tuvwelu-vwelu na vana va vindonga, co womisile mema mu vindonga vyakama.

¹⁶ Yove watangele litangwa na vutsiki, co waakele litangwa na ngonde mu myela yavyo,

¹⁷ yove waakele vinginga vya asi, co waakele ndombo na cisika.

¹⁸ Shukulu Kalunga, anuka muvali nakukujola vitozi, anuka muvali nakushaula, nakuyeluwisa lizina lyove.

¹⁹ Kesi useze vanu vove vaje kuvesi na seo ku vitozi vavo vaka-muuka, kesi wivale vanu vove vaje vali mu tuyando!

²⁰ Anuka cikumiiyo cije walikumiiye netu, omwo ku mitambela yoshe ya ano asi kuli lwozi.

²¹ Kesi utave vaje vali mu tuyando vazive shwamwa, oloni tuutu na vaka-kujeneka vakushangazale.

²² Katuka nakulyamena yove Njambi! Anuka ngeci simbu yoshe vaka-vuvi valinakukujola!

²³ Kesi wivale muyoyo, uje uvalinakulinga vitozi vove, uje uvalinakulinga simbu yoshe.