Myaso 73 - Livulu lya Shukulu Kalunga

LIVULU LYAMUCITATU (Mwaso 73–89) Vushunga vwa Njambi

Mwaso wa Asafe

¹ Mwa vushunga Njambi wakala na ngozi ku Isalele, kuli vaje vanajele mu vimbunge.

² Oloni kukulaela kwange kunesi kuhwile,

³ omwo njamwene vaka-kulyalesa, na vaka-vuvi vavezika.

⁴ Vakevo kuvesi kuyanda na mishongo, oloni vali na nzili na vukangule.

⁵ Kuvesi kuyanda ngwe muvakayanda vakwavo, nambe kumona tuyando ngwe tuvakamono vakwavo.

⁶ Kulyalesa kwavo vasa kucimona ngwe sungu ili mu mukoshi na lwozi valinga vasa kulumona ngwe vuzalo vwavo,

⁷ vimbunge vyavo vituwisa vuvi, co mana avo ali na matumbe a vuvi.

⁸ Vajola vakwavo nakuvendeka vyuma vyavivi, omwo kulyalesa kwavo vatumba matumbe akuyandesa vakwavo.

⁹ Vendeka vya vivi ali Njambi wa mwilu, nakwana mashiko angoco ku vanu va asi.

¹⁰ Nameme vanu va Njambi vatengulukila kuli vakevo, nakukulaela mu vyoshe vivendeka,

¹¹ Vendeka ngwavo, “Njambi azivuka vatijo? Wa Akamwa ya Akamwa amona vatijo?”

¹² Omu mukemwo muvafwa vaka-vuvi. Vali na vyavingi, co simbu yoshe vawezelelako ku vufuko vwavo.

¹³ Seo mukajo njilinayo nga njilijelesa, kulinga vuvi?

¹⁴ Unanjiyandesa litangwa lyoshe yove Njambi, co ulinakunjihisa a mutondo na mutondo!

¹⁵ Nga njendekele vyuma vyavivi, ngwe njinapu nji muka-kwenda vungungu vanu vove.

¹⁶ Njesekele kuyongola a vukalu ovu, oloni vwanjikaluwilile manene,

¹⁷ noo njakovelele mu Njuvo yove, asinoni njazivisisile vije vikalingiwa ku vaka-vuvi.

¹⁸ Mwa vushunga ukavaka mu mitambela yakuseneta, co ukavawisila asi nakuvanyongesa!

¹⁹ Vakaziva lyova lyakama, vakavanyongesa voshe njwa naumo wai akasalao.

²⁰ Vanafu ngwe njozi omo munu enduka mu tulo, mukemwo mucinapu kuli yove, Shukulu Kalunga omo winduka, co ukavayengula.

²¹ Omo njaviililile, co mbunge yange yavavalele,

²² njapwile nji cikolokomba na munu wa vunzimba, njapwile nji cinzinda ngwe kasitu kuli yove.

²³ Nameme ngoco njili nove simbu yoshe, yove unanjikwata ku livoko lyange lya cilyo.

²⁴ Yove unjitwamenena na mana ove, co akukotoka ukanjitambula na kasingimiko.

²⁵ Iyajo lalo injilinendi mwilu kutuvakana yove? Kukwesi weka injishaka ano asi kuvanga yove lika.

²⁶ Muvila wange na mbunge yange vyasa kuzeya, oloni Njambi wapwa nzili yange, ikeye lika injishaka!

²⁷ Mwa vushunga vene vanu vaje vakuvyana vakanyonga, co ukanyongesa voshe vaje kuvakulaela kuli yove.

²⁸ Oloni ngeci mwange ni, mwamuvwa kukala kuyehi na Njambi! Shukulu Kalunga wa Akamwa ya Vyoshe, njinamupwisa cimpaka cange, co njikambulula vilinga vyendi vyoshe.