Myaso 72 - Livulu lya Shukulu Kalunga

Lilombelo lya mwene

Mwaso wa Solomoni

¹ Longesa mwene kusompa na vushunga vwove yove Njambi, mulongese kupanga mwa vushunga,

² ngecivene, akaakwile vanu vove mu vushunga, nakusompela vaka-kuyanda mu vushunga.

³ Vimbuto vimene mwamuvwa mu livu, livu limenese vimbuto mu vushunga.

⁴ Mwene asompele vaka-kuyanda mwamuvwa, akwase vaka-kujeneka, nakufungulula vaje vavayandesa!

⁵ Vanu vove vakulemese ku myaka yoshe, ngwe mulyakala litangwa ku myaka yoshe, ngwe muyikatu ngonde ceke ku myaka yoshe, ku cisemwa cikaija kulutwe.

⁶ Mwene apwe ngwe nyonzi inyokela mu mahya, ngwe nyonzi ya vusuku-mbundu ije inyokela mu lifuti.

⁷ Mwene alinge vushunga na vanu voshe, kukale kwoloka simbu yoshe noo ngonde inatsi.

⁸ Vumwene vwendi vukashangumukila ku mema a kalunga, vuketa na ku mema a kalunga akwavo. Vumwene vwendi vukatunda ku Ndonga ya Yufuleti nakweta ku shongo ya kaye.

⁹ Vanu va mu mambo vakalemesa vumwene vwendi, co vitozi vendi vakalimbondinga mu livu.

¹⁰ Vimyene va ku Sipeini na ava va ku man̄anda vakamulambwila milambu, na vimyene va ku Shemba na ku Semba vakamunenela vwana.

¹¹ Vimyene voshe vakatsikama ku mesho endi, co miyati yoshe vakamupangela!

¹² Apatula tuutu vaje vatambeka kuli ikeye, vaje voshe vanajeneka na vaje vavanayengula ikeye avapatula.

¹³ Azivila mema ku mbunge vaka-kuzeya na tuutu, co amena voshe vaje vanajeneka.

¹⁴ Ikeye avamena kuli vaka-muuka, na kuli vaka-kuvalinga mwamuvi, maninga avo akala na seo ku mesho endi.

¹⁵ Mwene ayoye myaka yoshe! Vamwane ngolinde ya ku Shemba, co vanu vamulombelele simbu yoshe, vivezikiso vya Njambi vikale ali ikeye simbu yoshe!

¹⁶ Tiliku ipwe yaingi mu lifuti, akamwa ya malundu ashule na vimbuto, vipwe vyavingi ngwe vimbuto vya ku Lembanone. Vinganda vishule na vanu, ngwe mwila wa mu mahya.

¹⁷ Lizina lyendi likale ku myaka yoshe, lutsimo lwendi lukale simbu yoshe ngwe mulyakala litangwa. Vanu voshe vakavezika muli ikeye, miyati yoshe vehule Njambi ngeci avavezikise ngwe muje mwanavezikisa mwene!

¹⁸ Shangazaleni Shukulu Kalunga, Njambi ya Isalele! Ikeye lika muka-kulinga vyuma vyakukomokesa!

¹⁹ Shangazaleni lizina lyendi lya vumpau ku myaka yoshe! Kaye koshe kashule na vumpau vwendi! Ewa! Ewa!

²⁰ Malombelo a Ndaviti muna Njesi anahwila aa vene.