Myaso 71 - Livulu lya Shukulu Kalunga

Lilombelo lya kakulukazi

¹ Shukulu Kalunga njitewela muli yove, kesi vanjizivise shwamwa ku myaka yoshe!

² Njipatule nakunjamena mu vushunga vwove, njitolilile nakunjamena.

³ Pwa limanya lyange mwakutewela, muje njasa kutewela simbu yoshe, shika lishiko lyakunjamena! Omwo yove u limanya lyange na cimpaka cange.

⁴ Yove Njambi yange, njipatule ku livoko lya vaka-vuvi, nakunjitundisa ku livoko lya vaka-muuka na vaka-vuvi.

⁵ Shukulu Kalunga wa Akamwa ya Vyoshe, njaka cinyangavili cange muli yove, yange njakukulaela tunde ku simbu ya vwanike vwange.

⁶ Mukuyoya kwange kwoshe njayoyela muli yove, unanjinyungu tunde akusemuka kwange, simbu yoshe njikakushangazala!

⁷ Kuyoya kwange kunapu cimweso ku vanu vavangi, omwo yove unapu cimpaka cange cakukola.

⁸ Litangwa lyoshe njikakushangazala, nakukusingimika nakwambulula vumpau vwove.

⁹ Kesi unjumbile kuti omo njinakuluvala, co kesi unjiseze omo njinazeye!

¹⁰ Vitozi vange vashaka kunjitsiya, vanjikela munga.

¹¹ Vendeka ngwavo, “Njambi namuseza, tumushekeni ngeci tukamukwate, naumo wai akamwamena!”

¹² Yove Njambi kesi ukale kulyala nange, Njambi yange, zambula unjikwase!

¹³ Vaje voshe vashaka kunjilwisa vafungulule nakuvanyongesa! Vaje voshe vashaka kunjivulumuna, vazivise shwamwa.

¹⁴ Cinyangavili cange simbu yoshe cakala muli yove, co simbu yoshe njikakushangazala.

¹⁵ Njikambulula vyuma vyavivwa vije viwukalingi, litangwa lyoshe lyamutunu, njikambulula kwamena kwove, nambe kunatuvakana muje munjizivukilamo.

¹⁶ Shukulu Kalunga Njambi, njikaya mu nzili yove yakama, njikambulula vushunga vwove lika.

¹⁷ Yove Njambi wanjilongesele tunde ku vwanike vwange, kweta na simbu ino njicili nakwambulula vilinga vyove vyakukomokesa.

¹⁸ Ngecivene, nameme njinakuluvala manene na vwele vuli ku mutwe wange, yove Njambi kesi unjiseze, noo njikambulula vilinga vyove ku visemwa vyoshe vije vikaija kulutwe.

¹⁹ Vushunga vwove yove Njambi, vunete mwilu ya melu. Yove Njambi unalingi vyuma vyakama, naumo wai nalifu nove.

²⁰ Yove unanjimwesa tuyando twakama twakukaluwa, oloni ukanjiyoyesa lalo, ukanjitundisa lalo mu mbumbo.

²¹ Ukanjipwisa nji wakama manene, kutuvakana munjafwile laja, co ukanjizembeleka lalo.

²² Mwa vushunga njikakushangazala lalo na kalyalya, njikashangazala kulongwa kwove, yove Njambi yange. Njikakwimbila myaso a kalyalya kange, yove Njambi wakujela wa Isalele.

²³ Njikatambeka nakujolela, njikaimba nakukushangazala na mbunge yange yoshe, omwo unanjamena.

²⁴ Njikendeka vushunga vwove litangwa lyoshe, omwo vaje vashakele kunjivulumuna, unavafungulula nakuvazivisa shwamwa.