Myaso 70 - Livulu lya Shukulu Kalunga

Lilombelo lyakukwasa

Mwaso wa Ndaviti, mbimbi

¹ Njamene yove Njambi, zambula ngeci unjikwase, yove Shukulu Kalunga!

² Vazivise shwamwa nakutanganesa vaje vashaka kunjitsiya. Velwise vuseta-nima nakuvazivisa shwamwa, vaje vavwaelela omwo njili mu tuyando! Vazive shwamwa nakulikomokela.

³ Voshe vaje vanjishendumuna, nakwendeka nange ngwavo, “Mbwatu,” vazivise shwamwa nakulikomokela.

⁴ Voshe vaje vakushakezeka, vavwaelele nakujolela. Voshe vaje vakandelela kwamena kwove, simbu yoshe vendeke ngwavo, “Njambi wapwa wakama!”

⁵ Njiwakuzeya na kuutwa yove Njambi zambula unjamene, yove Shukulu Kalunga yove wapwa muyoyesi wange, zambula unjamene!