Myaso 7 - Livulu lya Shukulu Kalunga

Lilombelo lya vushunga

Mwaso wembile Ndaviti kuli Shukulu Kalunga omwo ya Kushe kaMbenjemani

¹ Yove Shukulu Kalunga Njambi yange, muli yove mukemwo njiwana kuvanda, njamene nakunjipatula kuli voshe vaje valinakunjisheka,

² nga kuulingimo, co vanjitatuvula nakunjisanyozola vipuka-vipuka ngwe vindumba, co naumo wai anjamena.

³ Yove Shukulu Kalunga Njambi yange, nga njinaviisila musamba wange, nga njinende vungungu musamba,

⁴ nambe kuzivila citozi cange mema ku mbunge, nga njinalingi vyuma evi,

⁵ co tava vitozi vange vanjisheke nakunjikwata. Vatave ngeci vanjilyatangele nakunjitsiya, nakunjiseza asi.

⁶ Yove Shukulu Kalunga, luvala nakulinga cuma cimo, lwisa vitozi vange vaje vanaluvala nange, mona ngeci vushunga vulinakulingiwa.

⁷ Mbunga ya vanu voshe valikungulwile kuli yove, omo utumbama a litanda lyove lya vumwene.

⁸ Shukulu Kalunga, yove lyaako wa vanu voshe. Njisompe nakuwana ngeci yange kunjesi na mulonga.

⁹ Yove u Njambi wa vushunga, wilula viyongola vyetu na vizango vyetu. Vindika vilinga vya vanu vya kupenga-penga, oloni nyunga voshe vaka-kukwononoka.

¹⁰ Njambi ikeye ntelo yange, ikeye muka-kwamena vaje voshe valinga vya vushunga.

¹¹ Njambi wapwa lyaako wa vushunga, co simbu yoshe akahisi vaka-vuvi.

¹² Nga vaka-vuvi kuvatenguluka ku vilinga vyavo vyavivi, co Njambi akotola moko yendi ya mukwale, nakulema vuta vwendi vwa lusipa,

¹³ nakuvwaesela cimweja nakunana mikili yendi ya milangi ya tuhya.

¹⁴ Kengeni vaka-vuvi muvakayongwelamo vuvi, vayongola vingila mwakulingila vuvi, nakwendeka makuli.

¹⁵ Vanu va cifwa eci valinakunjeseka, co kweseka kwavo kuvelukile vakevo vavenya!

¹⁶ Vilinga vyavo vyavivi, vikavelukila vakevo vavenya.

¹⁷ Njikandelela kuli Shukulu Kalunga, omwo ya vushunga vwendi, njikaimba myaso yakushangazala Shukulu Kalunga, wa Akamwa ya Akamwa.