Myaso 69 - Livulu lya Shukulu KalungaLilombelo lyakukwasa Mwaso wa Ndaviti 1 Njamene yove Njambi! Omwo mema ashaka kunjikupula, 2 njinatomena mu vutome vwakulova, muje kumwesi livu lyakukola akwimana, mema akulova ashaka kunjikupula, co mankimba ao alinakunjikoka ngeci anjikupule. 3 Mwa vushunga vene njinazeye nakulila, mulivu wange unominina, na mesho ange anatsitsivala omo njilinakuvandamena Njambi yange. 4 Vaje vaka-kunjizinda kujeneka mulonga vanatumu manene kutuvakana vin̄ambu vya ku mutwe wange. Vitozi vange vendeka makuli ali yange, vali na nzili, co vashaka kunjitsiya. Valinakunjisindiya kwilwisa vyuma vije kunjevile. 5 Yove Njambi uzivuka vukolokomba vwange, co vuvi vwange kuvwavandele kuli yove embwe. 6 Yove Shukulu Kalunga wa Akamwa ya Vyoshe Muka-nzili yoshe, Kesi utave njizivise shwamwa vaje valemesa yove, kesi utave njishawise vaje valemesa yove Njambi ya Isalele! 7 Omwo a lizina lyove vananjishaula, ngeci njili na shwamwa. 8 Yange njinapu ngwe nji mungenzi kuli vandolome vange, njinapu ngwe nji muka-kwija ku naanga yange. 9 Cizemo cange ku Njuvo yove, yove Njambi, cilinakushukuma muli yange ngwe tuhya, co kushaula kuje vakushawile kuli ali yange. 10 Njalilile nakulikela kulya, oloni vanu angavene vanjishawile 11 omo njazalele cikeleya kumwesa vusiwa vwange, vanu angavene vanjishendumwine. 12 Vaka-kushwana na maako vasimutwiiye ali yange mu vingila, co njapwa mwaso lalo kuli vaka-kupenda vwala. 13 Njilomba kuli yove Shukulu Kalunga, njikumbulule yove Njambi, a simbu ije iwunaangula, njikumbulule omwo cizemo cove cije kucesi kutenguluka, omo wanyunga cikulaeso cove nakwamena. 14 Njitundise mu vutome, njinyunge mwamuvwa ku vitozi vange, nakunjinyunga ku nzinga ya mema akulova. 15 Kesi utave livazi linjikupule, kesi utave njikovele mu nzinga, nambe kesi utave njikovele mu mbumbo. 16 Njikumbulule yove Shukulu Kalunga, omwo cizemo cove cije kucesi kutenguluka capwa cacivwa, nakutetela kwove kuje kwakama manene, njitolilile! 17 Kesi unjikengese nima, yange nji ngamba yove, njili mu kayando, njikumbulule vwasi. 18 Shwenya kuyehi nange nakunjamena ku vitozi vange. 19 Yove uzivuka kushauka kwange, na shwamwa yange kasingimiko, yove uzivuka vitozi vange voshe. 20 Kapopolwezi kavo kanazeyesa mbunge yange, co nomu munjilingila vene mwai, njashakezekele munu wakunjitetela, oloni kunjamuwanene, na vaka-kunjizembeleka, oloni naumo wai injawanene. 21 Omo njakele na njala, vanjanene nyanga, omo njakele na lihwila, co vanjanene vinyu vyakulula. 22 Viwano vyavo vipwe vinganjo vyavo vavenya, viwano vyavo vyakujela vipwe vimbulu vyakuwilamo vakevo vavenya! 23 Tsitsivalesa mesho avo ngeci kesi vamone, co simbu yoshe vende oku vapelyangela! 24 Vamwese vukalu vwove, luvala navo nakuvakwata! 25 Nyongesa vilombo vyavo, ngecivene, kesi kukakale umo mu vimbalaka vyavo! 26 Omwo vayandesa munu uje iwunahisa, co vendeka a tuyando twa uje iwatwile mbandu. 27 Nyunga vukaleo vwavuvi vwavo vwoshe, kesi uvasambese ku vuvi vwavo. 28 Zimangana mazina avo mu livulu lya vaka-kuyoya, kesi uvasoneke amolika na vaka-vushunga. 29 Oloni yange valinakunjiyandesa, co lalo njili mu vukalu, njamene yove Njambi, co njinyunge mwamuvwa! 30 Njikashangazala Njambi na mwaso, njikendeka a vukama vwendi nakumukandelela. 31 Eci cikavwaelelesa Shukulu Kalunga kutuvakana kumukombelela ngombe, nambe kutuvakana kumukombelela ngombe wakama wa nkomba. 32 Omwo vaka-kuyanda vakamona vyuma evi, co vakavwaelela, vaje valemesa Njambi vakavatakamesa. 33 Shukulu Kalunga akatolilila kulila kwa vaje vanajeneka, co kakevala vanu vendi vaje vali mu kamenga. 34 Lilu na asi, na mema a kalunga na vyoshe vilimo vishangazale Njambi ngwe vanu! 35 Omwo Njambi akamena Siyone, nakutungulula vinganda vya Yunda, co vangamba vendi vakakala muje, co lifuti likapwa vushwana vwavo, 36 vatekulwila va vangamba vendi, vakashwana muje, co voshe vaje vazema Njambi vakakala kuje. |
The Bible in Mbunda ©The Bible Society of Zambia, 2006
Bible Society of Zambia