Myaso 68 - Livulu lya Shukulu Kalunga

Mwaso wa mbunga wakulisamba

Mwaso wa Ndaviti

¹ Omo Njambi akakatuka, akashandola vitozi vendi! Vaje vamuzinda vakatunda ku mesho endi!

² Akavatundisa ku mesho endi, ngwe muvukapekumuka vwisi, Njambi akanyongesa vaka-vuvi, ngwe muyikanyongolokota sela mu tuhya.

³ Oloni vaka-vushunga vavwaelela nakujolela ku mesho endi, mwa vushunga vene vavwaelela nakujolela.

⁴ Imbeni kuli Njambi, imbeni nakushangazala lizina lyendi, vwaeseni ngila ya uje alinakwita mu mambo. Lizina lyendi ikeye Shukulu Kalunga, vwaeleleni ku mesho endi!

⁵ Njambi uje wakala mu Njuvo yendi yakujela, ikeye muka-kulela visiwa nakunyunga vifwile.

⁶ Njambi akana njuvo yakukala kuli vaje vali avo lika, atundisa vinzinda nakuvavezikisa, oloni vaka-kumutengulukila vakakala mu mambo.

⁷ Omo watwamenenene vanu vove yove Njambi, nomu wavetisile mu mambo,

⁸ asi ajajele, co lilu lyanyokesele nyonzi, omwo kwija kwa Njambi wa Sinai, kwija kwa Njambi wa Isalele.

⁹ Wanyokesele nyonzi yaingi manene, ije yakolesele livu lyakukushungukwa

¹⁰ mbunga ya vanu vatungile muje, muvuvwa vwove yove Njambi, wamwesele cizemo cove kuli tuutu.

¹¹ Shukulu Kalunga washikile lishiko, co vanakazi vavangi vambulwile muzimbu ngwavo,

¹² “Vimyene na mahunzi a mashwalale vavo vatewele! Co vanakazi vaje vasalele hembo valipangezelele vije vyakupukula,

¹³ nameme mulala mukati ka limba lya vimanga, oloni mukafwa ngwe mambava a liyembe akulameka na siliva, na maunga endi akulameka na ngolinde yavushompo.”

¹⁴ Omo Njambi Muka-nzili yoshe washandwele vimyene a munkinda wa Zalemone, co mema akukonda awililile aje.

¹⁵ Munkinda wa Mbashane ukewo munkinda wakama, wapwa munkinda waulaja.

¹⁶ Omwo vikajo munkinda wa Mbashane, ulingacije ngwe munu ali na cipululu ku munkinda uje wanalyangwila Njambi? Ukapwa limbo lya Shukulu Kalunga ku myaka yoshe!

¹⁷ Shukulu Kalunga watundile ku Munkinda wa Sinai na matemba endi amangi-mangi a nzili, co wezile ku mutambela wakujela.

¹⁸ Omo walondele a munkinda waulaja, waile na vinzinda vavangi, co watambwile vwana kuli vanu vaka-kutengulukila. Shukulu Kalunga Njambi akakala kuje.

¹⁹ Wakushangazala Shukulu Kalunga, uje akatulingi mwamuvwa a litangwa na litangwa, ikeye vene Njambi muka-kutwamena.

²⁰ Njambi yetu wapwa Njambi muka-kutwamena, ikeye wapwa Njambi, Shukulu Kalunga uje muka-kutupatula ku kutsa.

²¹ Mwa vushunga Njambi akatavozola mitwe ya vitozi vendi, vaje vakakateya mu vingila vyavo vya vuvi.

²² Shukulu Kalunga nendeka ngwendi, “Njikatundisa vitozi veni ku Mbashane, co njikavatundisa lalo ku nzinga ya mema a kalunga,

²³ ngeci mukenda mu maninga avo, co tutali tweni vakakacula maninga avo.”

²⁴ Yove Njambi yetu na mwene yetu, tunamono laja vimbunga vya vanu, vaya ku mwela wove wakujela.

²⁵ Vaka-kwimba vakele kulutwe, co vaka-kwimba na vyuma vyakwimbisa vakele munima, mukati kavo mwakele vambanda vaje vaimbile tumbulumbumba.

²⁶ Vezile oku vatambeka ngwavo, “Shangazaleni Njambi mu vikungulukilo vya vanu vendi, yeni voshe vatekulwila va Yakomba, shangazaleni Shukulu Kalunga!”

²⁷ Akulivanga kwezile Mbenjemani, muyati waundondo-ndondo, asinoni kwakavele vantwama va Yunda na vimunga vyavo, kwatele vantwama va Zembuloni na Nafetali.

²⁸ Mwesa nzili yove Njambi, ije wapangesele ali yetu mukutwimanena.

²⁹ Omwo ya Njuvo yove ya mu Yelusalema, vimyene vakakunenela vwana.

³⁰ Vindika Ingito, cikashama uje wa mu mahongo, vindika miyati ya vanu ije vantwama vavo vanapu ngwe vingombe va nkomba va vukalu, voshe vatsikame nakukwana siliva yavo. Shandola vanu vaje vazema nzita!

³¹ Vaka-kwimanena mafuti vakatunda ku Ingito, co vaka-Sundane vakajundula mavoko avo nakulombela kuli yove Njambi.

³² Imbileni kuli Njambi, vumwene vwoshe vwa asi, imbeni nakushangazala Shukulu Kalunga.

³³ Kuli uje endela a lilu lya melu a ku san̄ulu! Mutolilileni omo endeka na lijwi lyendi lya nzili!

³⁴ Ambululeni nzili ya Njambi, vumpau vwendi vuli mu Isalele, nzili yendi ili mwilu lya melu.

³⁵ Njambi ya Isalele wapwa wakukomokesa mu Njuvo yendi yakujela! Ikeye akana nzili ku vanu vendi. Shangazaleni Njambi!