Myaso 66 - Livulu lya Shukulu Kalunga

Mwaso wakushangazala nakukandelela

Mwaso

¹ Shangazaleni Njambi yeni vanu voshe va asi, na mutambi wakujolela!

² Imbeni mwanuke vukama vwa lizina lyendi, mushangazaleni nakumulemesa!

³ Endekeni kuli Njambi ngweni, “Unalingi vyuma vyakukomokesa, nzili yove inapu yakama manene ngeci vitozi vove valiita kuli yove.

⁴ Vanu voshe va ano asi vakakulemesa, vakaimba myaso yakukushangazala, vakaimba nakushangazala lizina lyove.”

⁵ Ijeni mumone vyanapanga Njambi, vilinga vyendi vyakukomokesa vyanalingi akati ka vanu.

⁶ Watepesele mema a kalunga, co vakukulwila vetu vajavukile ndonga na mendi. Co twajolelele omwo a vije vyalingile.

⁷ Ikeye ashwana na nzili yendi ku myaka yoshe, co mesho endi alinakukenga a miyati yoshe. Kesi mumutengulukile nakumulwisa.

⁸ Shangazaleni Njambi yetu yeni vanu voshe, kushangazala kweni vacizive.

⁹ Ikeye akanyungu myonyo yetu, kesi kutava ngeci tupelyangele.

¹⁰ Unatwilula yove Njambi, co unatweseka ngwe muvakeseka siliva mu tuhya.

¹¹ Unatava ngeci tutse mu mweto, co unatutwiki vitele vyakulema a myongo yetu.

¹² Unatava ngeci vitozi vetu vatulyatangele, tuneti mu tuhya na mu livazi, oloni ololo unatwetesa ku mutambela wauvwa.

¹³ Njikanena vin̄ombelo vya kwenyeka ku Njuvo yove, co njikakombelela vije vinjakukulaesele.

¹⁴ Njikakwana vije vinjakukulaesele, omo njakele mu tuyando.

¹⁵ Njikakombelela vin̄ombelo vya kwenyeka vya vimanga a mutula, njikakombelela lalo vingombe va nkomba na vimembe, co vwisi vukaya kwilu.

¹⁶ Yeni voshe vaka-kusingimika Njambi, ijeni, co tolilileni, ijeni njakumileke vije vyananjilingila.

¹⁷ Njatambekele kuli ikeye ngeci anjikwase, co njamushangazalele na myaso.

¹⁸ Nga njashwekele vuvi vwange, nga Shukulu Kalunga kanjitolilile.

¹⁹ Oloni mwa vushunga Njambi wanjizivile, co watolililile ku lilombelo lyange.

²⁰ Njikashangazala Njambi, omwo kavyanene lilombelo lyange, nambe kutundisa cizemo cendi cije kucesi kutenguluka kuli yange.