Myaso 65 - Livulu lya Shukulu Kalunga

Kushangazala nakukandelela

Mwaso wa Ndaviti

¹ Mwamuvwa kuli yetu kukushangazalela mu Siyone yove Njambi, nakunyunga vikulaeso vyetu kuli yove,

² omwo yove ukakumbulula malombelo, vanu voshe vakaija kuli yove.

³ Milonga ya vuvi vwetu inatuhyana, oloni yove watusambeseleyo.

⁴ Navezika munu uje iwunaangula, nakumushwenyesa kuli yove, ngeci akale mu lipela lyove. Tunakuta na vyuma vyavivwa vya ku Njuvo yove, vivezikiso vya mu Njuvo yove yakujela!

⁵ Yove ukatukumbulula nakutuhyanesa, unalingi vyuma vyakukomokesa mukutwamena. Vanu voshe vali ano asi, nameme vali kulyala ku mema a kalunga vanakulaela kuli yove.

⁶ Yove wemikile minkinda mu mitambela yayo na nzili yove, mukusholola nzili yove yakukomokesa.

⁷ Yove ukolwesa kukuma kwa mema a kalunga, na muyoyo wa mankimba, ukwolwesa lalo muyoyo wa vanu.

⁸ Vanu voshe vaje vali kulyala, vanazivi lyova a vikomokeso vyove. Vilinga vyove vinena kujolela nakuvwaelela kuli voshe vaje vali a kaye.

⁹ Ukanyungu lifuti akulitumina nyonzi, co wakamo vwilo. Ukashulisa vana va vindonga na mema, nakumenesa vimbuto asi. Omu mukemwo muukalingi.

¹⁰ Ukatumu nyonzi yaingi ya vusuku-mbundu nakumenesa vimbuto.

¹¹ Vushunga vwove vunena kuteja kwakuvwa! Kwoshe kuje kuuli kwakala vyuma vyavingi!

¹² Ku mutambela kwakulila vimanga kunashulu na matanga, kumukulo wa malundu kunashulu nakujolela.

¹³ Mu vimbongo munashulu vimanga, na mu vyana munashulu tiliku, vyoshe vitambeka nakwimba nakujolela ngwe vanu!